هێزێکی هاوبەش کە نوێنەری دژەتێرۆری عێراق و پۆلیسی لابردنی زیادەڕۆ و نوێنەرانی کارەبا و پۆلیسی نەوتیان تێدابوو، ژمارەیەک بەنزینخانەی بازرگانیان بەبیانووی نەبوونی مۆڵەتی وەزارەتی نەوت لە
کەرکوککەرکوک رووخاند کە زۆربەیان خاوەنەکانیان کوردن.
حەویز دڵشاد، خاوەنی بەنزینخانەی بازرگانی لە کەرکووک بە رووداوی راگەیاند: کرێکارەکانیان برد بۆ ماوەی دوو سێ رۆژ لای خۆیان زیندانیان کردبوون، پێیان گوتبوون جارێکی دیکە نەچنە سەر بەنزینخانەکان، بەڵام ئاگادار نەکراینەوە رۆژی دواتر شۆفڵیان هێنا و بەنزینخانەکانیان رووخاند.
بڕیارەکە 113 بەنزیخانە دەگرێتەوەو،ئەوانەی نەڕووخێندراون دەبێت بەتەواوی دایبخەن. حەسەن تائی، کرێکار لەبەنزینخانەیەکی بازرگانی لە کەرکووک بە رووداوی راگەیاند: هەموویان داخست، بەبیانوی نەبوونی مۆڵەت، ئیتر نازانم هۆکارێکی دیکە هەبێت، بەڵام داوا لەحکومەتی عێراق دەکەین، ئەم بەنزینخانانە بکاتەوە، چونکە خەڵک نانی لەسەر ئەوەیە.
داخستنی ئەو بەنزینخانانە لیژنەی نەوت و وزەی لەئەنجوومەنی پارێزگای کەرکووک هێنایە دەنگ بەڵام بەو پێیەی بڕیارەکە لەبەغداوە هاتووە، ئەوانیش دەستەو وەستانن و هیچیان پێ ناکرێ.
نەجات حوسێن، ئەندامی لیژنەی نەوت و وزە لەئەنجوومەنی پارێزگای کەرکووک بە رووداوی راگەیاند: بڕیار لەئەنجوومەنی وەزیران دەرچووە نەک لە کەرکووک، دەبێ 113 بەنزینخانەی بازرگانی بێ مۆڵەت دابخرێن، جگە لە 6 بەنزینخانە ئەوانە رەزامەندی وەبەرهێنانیان هەیە و پارێزگاریش نووسراوی کردووە بۆ بەنزینخانەکان و بەغدا کە مامەڵەکانیان ببەن و بیسەلمێنن کە کێشەیان نییە و رەزامەندییان وەرگرتووە، ئەگینا ئەوانەی دیکە دەبێ دابخرێن و لاببرێن.
جگە لەو 113 بەنزینخانە بازرگانیە کە فەرمانی داخستنیان بۆ دەرچووە و زۆربەی خاوەنەکانیان کوردن، 67 بەنزینخانەی دیکە مۆڵەتییان بۆ کراوە.
لە 22 بەنزینخانەی حکومی رۆژانە بەنزین بەنرخی 450 دینار و بەکۆبۆن دابەش دەکرێ، بەڵام بەو پێیەی رۆژانە ملیۆنێک و دووسەد هەزار لیتر بەنزین دەگاتە کەرکووک کەبڕەکەی کەمە، زۆرجار قەرەباڵخی لەبەنزینخانە حکومییەکان دروست دەبن، ئەوکات خەڵک پێویستییان بە بەنزینخانەی بازرگانی دەبێ.
[1]
03-01-201903-01-2019| 🗄 سەرچاوەکان |
| [1] | 📡 ماڵپەڕ | 🏳️ کوردیی ناوەڕاست | ماڵپەری رووداو - 03-01-2019 |