ب هەلکەفتنا وەغەرا دويماهيێ يا خودێ ژێ ڕازی #مير تەحسين بەگ#، ميرێ ئێزدييا، بەهيداری و سەرساخيێ ل مالبات و کەسوکارێت وی و جڤاتا ڕووحانی و هەمی خوشک و برايێت مە يێت ئێزدی و گەلێ کوردستانێ بگشتی دکەم. هەڤپار و هەڤخەمێن مالباتا وی و تەڤاهييا ئێزديياينە.
مير تەحسين بەگ کو پتری حەفتێ سالێت چوويی ميراتيا ئێزدييا ل کوردستانێ و جيهانێ کر، تەڤی کو دناڤ ئێزدييادا خودان پێگەه و ڕۆڵەکێ جڤاکی و ئۆلی يێ ديار بوو، هەروسا د تەڤگەرا کوردايەتيێ و بتايبەتی ژی د شۆڕەشا ئەيلوولێدا خودانێ ڕۆل و بەشدارييەکا بەرچاڤ بوو، پشتی شۆڕەشێ ژی ژبەر هەلوێستێن خۆ دەربدەری ولاتان بوو.
مير تەحسين بەردەوام دگەل جڤاکا کوردستانێ و عێراقێ و يا دەڤەرێ ژی د پەيوەنديێدا بوويە و ڕێز و پێگەهێ وی يێ جڤاکی نە بتنێ دناڤ ئێزدييادا، بەلکی دناڤ جڤاکا کوردستانێ و يا عێراقێدا ژی ديار و بەرچاڤ بوويە و خودان تۆڕەکا بەرفرەها پەيوەندييا بوو. بەردەوام هەول دايە کو گيانێ پێکڤەژيانێ و هەڤقەبوولکرنێ دناڤ پێکهاتێن کوردستانێ و عێراقێدا خورتر و کوورتر بکەت.
بيرهاتنا وی ب خێر بيت و خودايێ مەزن ب دلۆڤانييا خۆ شا بکەت.
#نێچيرڤان بارزانی#
سەرۆک وەزيرێ هەرێما کوردستانێ
#28-01-2019#