فوئاد مەجید میسری
فوئاد مەجید میسری و کۆی بەرهەمە شانۆییەکانی
گومانی تیا نییە، فوئاد مەجید میسری، یەکێکە لەو کەسە کەمانەی دەمێ ساڵە لە ژێر کاریگەری میتود و دیدی شانۆیی برێشت و تەکنیکی نامۆبووندا چەندان دەقی شانۆیی ناوازەی نووسیوە، هاوکات چەندان دەقی تری ئامادە کردووە و وەرگێڕاوە. بە داخەوە من ئەم هەوڵانەی کاک فوئاد، کە لەسەر شانۆکانی سلێمانی پێشکەش دەکران، نەدیوە، لەبەر ئەوەی ئەوکاتانە منداڵ بووم و هێشتا ڕێگام نەکەوتبووە شانۆکان. وابزانم تەنها (تەنەکە)م بینیووە.
فوئاد مەجید میسری لە هەوڵێکی بێ وێنەدا ئەم دەقانە و[1] هەموو ئەو دەقانەیشی کردوونی بە کوردی، لە کتێبێکی گەورەی 1000 لاپەرەیدا چاپ کردووە. کتێبەکە، جگە لە دەقەکان، چەندان دۆکیومێنت، بەڵگەنامە، پرۆگرامی نەمایشەکان، گفتوگۆ و لێکۆڵینەوە لەخۆ دەگرێت و بەمەیش بەشێکی گرینگی ئەرشیفی شانۆی کوردی پاراستوە، ئەو ئەرشیفەی ئێمە نیمانە. ئەم کتێبە گەنجینەیەکی گەورەیە بۆ شانۆی کوردی، بۆ ئەو کەسانەی دەیانەوێت لێکۆڵینەوە لەو قۆناخەی شانۆی کوردی بکەن و بۆ هەموو مێژووی شانۆی کوردی. بێگومان کاک فوئاد خزمەتێکی گەورەی بە ڕەوت و بزوتنەوەی شانۆی کوردی کردووە.