هونەرمەند #نەجمەدینی غوڵامی# دەمانگێڕێتەوە بۆ سەردەمی پێشمەرگایەتی و باسی یەکەم سەفەری دەکات بۆشاری هەڵمەت و قوربانی و بۆئەنجامدانی کاری هونەری.
هونەرمەند نەجمەدینی غوڵامی بەوشێوەیە لەبیرەوەرییەکانی لە#سلێمانی#دا دەدوێ :
ئەوکاتەی بارەگای سەرکردایەتی کۆمەڵە لە (#مالومە#و #چۆخماخ#) بوو، لەنێو خاکی کوردستانی بەشی عێراقدا، و لەبەرنزیکایەتی لەشاری سلێمانی و کرانەوەی ڕیگای هاتوچۆ بۆئەم شارەو لەبیری ئامادەکردنی کاسێتێکی نوێدابووم.
یەکەم سەفەرم بۆ سلێمانی کردوو ژمارەیەکی زۆر هونەرمەندم بینی، هەرچەندە ئەوکات خەڵک لەبەر دەسەڵاتدارییەتی ڕژێم نەیاندەوێرا لەئێمە زۆر نزیک ببنەوە، بەڵام سەرەڕای ئەوە گەلێک ئاشنای دلسۆز بوون کەخەمی ئەوشتانەیان نەبوو، بەوپەڕی دڵسۆزییەوە یارمەتییان دەکردین و منیش لەوماوەیەدا کۆمەڵە ئینسانێکی چاکم ناسیی،
من شریتی ئاگراوی (ئارام) م لەسالی 1984 بەیارمەتی ئەو ئینسانە دلسۆزانە پرکردەوە.
بەڕاستی لەوسەردەمەدا شریت تۆمارکردن گاڵتە نەبوو، بەهۆی شەڕی نێوان ئێران و عێراق زۆربەی هونەرمەندەکان لەبەرنەچوون بۆ سەربازی ڕایانکردبوو، ئەوانەشیی کەمابوونەوە یان لەسەربازی بوون لەترسی ڕژێم خۆیان لەخەباتی هونەری کێشابۆوە، ئەوەبوو کەشریتی ئارام وەک بۆمب تەقییەوە.
ناوی ئارام بەبۆنەی شەهیدبوونی (#شاسوار جەلال#) لەکوردستانی بەشیی عێراقدا بیرەوەرییەکی تایبەتی هەیە و لەکوردستانی بەشیی ئێرانیشدا بەبۆنەی شەهیدبوونی (#ئەسعەد غەمیان# ئەسەدی غەمیان) هەرئاوا ڕیزی لێدەگیرێ.
زۆرکەس هەن کەدەیانەوێ بزانن ئەم گۆرانییە چ بەسەرهاتێکی هەیەو چۆن دروست بووە.
(ئەسەدی غەمیان) خەڵکی #سنەیە# و هاوڕییەکی خۆشەویست و پێشمەرگەیەکی زۆر بەجەرگی کۆمەڵە بوو، لەشەریکی قارەمانانەدا شەهیدکرا، لەنێو پێشمەرگەکان و بنەماڵەکەیاندا زۆر خۆشەویست بوو، چەند ڕۆژ دوای شەهیدبوونی خوشکەکەی دێ چاوی پێ بکەوێت ئەو نازانێ شەهیدکراوە، پێشمەرگەکان بەدوای ئەوەدا چەند گوندی دەگێڕن و پێی دەڵین براکەت شەهیدبووە،
ئەودەگەریتەوە بۆ شاری سنە، بەڵام کۆڵ و سۆزو خۆشەویستی براکەی هەر لەدڵ دا دەبێ ڕۆژێک ئەم شیعرەی ئارامی ناردبوو،
من نازانم ئەو شیعرە هی خۆیەتی یان هی کەسێکی ترە، بەڵام بەبڕوای من هەتا کەسێک بەم جۆرە لەئارام نزیک نەبووبێ و هەستی خۆشەویستی ئەو کاری لێ نەکردبێ بێگومان ناتوانێ ئەو شیعرەی بۆ دانێ،
هاوینی مالومە زۆرگەرمە قرچە قرچی نیوەرۆبوو خەریکی خۆشکردنی جێ بۆ ڕادیۆ بووین و من پاچم لێدەدا، لەم کاتەدا ڕادیۆی کۆمەڵە بەرنامەی یادی هاوڕێانی شەهیدی بڵاودەکردەوە لەوبەرنامەیەدا لەئارام یادکراو و شیعرەکەیان خوێندەوە.
زۆرکاری لێکردم و پاچەکەم داناو پاڵمدا بەبەردێکەوە و دەروونم خەریک بوو دەکوڵی، دەریای هەستم شەپۆلی دەدا، لەپر گۆرانی ئارام لەنێو شەپۆلەکانی دەروونمدا سەری هەڵدا و هەرئەوکاتە بەپەلە چوومە ژووری ڕادیۆ بەشێک لەگۆرانیەکەم تۆمارکرد تا لەدوایی لەبیری نەکەم، ئەوە بەسەرهاتی ئەو گۆرانیەو شریتەی ئارام بوو، یەکێک لەباشترین گۆرانیەکانی ئەو سەردەمەیە و من هەرکاتێک دەیڵیمەوە بۆم تازەیە.
دوای بڵاوبوونەوەی ئەو شریتە بەیارمەتی دۆستانی نهێنی لە سلێمانی تۆمارکرا، خەڵکێکی زیاترم ناسیی و پەیوەندییەکان پتەوتر بوون، ئەوان بەنهێنی دەهاتن بۆ بارەگای کۆمەڵەو کاتی گۆرانی گوتن لەبارەگای خۆماندا پتر لەهەزار کەس لەشارەکانی کەرکووک و سلێمانی و شوێنەکانی تر لەمالوومە کۆدەبوونەوە.
لەساڵی 1986 یشدا شریتی (هەڵاڵەی کوێستان) م بەیارمەتی تیپی موزیکای مەولەوی ئامادەکرد و چەرمەسەرییەکی زۆرم لەگەڵ دیتووە، یەکێک لەتۆمارگاکانی سلێمانی ئەرکی تۆمارکردن و بڵاوکردنەوەی ئەم شریتەی وەئەستۆگرت، دوای ئامادەبوونی شریتەکە بردبووی بۆ بەغدا بۆلای شەریکەی (بابل) ئەوان شریتەکەیان وەرگرتبوو داوای تۆمارکردنیانلەتەلفزیۆن کردبوو بۆئەوکارەش ئامادەبوون پازدە هەزار دیناربدەن، چونکە بەڕاستی شریتێکی ڕێک و پێک بوو شیعرو گۆرانی و موزیکاکەی تازەبوون هەرچەندە کەچوون بۆتەلەفزیۆن وەک بیرەوەرییەکی ژیانی هونەری بۆهونەرمەندێک شیرینە، بەڵام چونکە من پێشمەرگە بووم و خەڵک زۆر ڕیزی لێدەگرتم، ئامادەنەبووم ئەوکارە بکەم، دیارە دەبێ ئەوەش بڵێم کە (#ناسر حەسەن#) کەکاربەدەستی تەلەفزیۆنی عێراق بوو، بەڵینی دابوومێ کە شریتەکەم وەک هونەرمەندێکی ئێرانی بڵاوناکاتەوە.
ئامادە کردنی: جەماڵ دەلاک