ل سنوورێ پارێزگەها #دهۆک# 70% بەرهەمێ نیسکان نوکان کێمبووینه، شارەزایەکێ چاندنێ ژى دبێژیت: ژبەر پلانێن لاواز یێن حکو‌مەتێ بەرهەمێ نیسکان و نوکان ل دهۆک کێمبووینە.
سالم جەعفەر، ئەندازیارێ چاندنێ و رێڤەبەرێ چاندنا مانگێشک بۆ دواڕۆژ گۆت:حکومەتا هەرێما کوردستانێ، بتنێ پلانا وەرگرتنا گەنمى هەیە، لەورا هەموو جۆتیارێن دەڤەرێ زەڤیێن خوە دکەن گەنم و دەست ژ چاندنا نیسکان و نوکان بەردایە.
گۆتژى:ل دەڤەرا مانگێشک سالێن دەر‌بازبووى نێزیکى 4000 دوونەمێن ئەردى بۆ چاندنا نوکان دهاتن بکارهینان، نیسک ژى ب هەمان رەنگ، لێ ئەڤ سالە کێمتر ژ 1000 دونەمان بۆ چاندنا نوکان هاتینە بکارهینان.
ناڤبۆرى دازانین:بگشتى ل سنوورێ پارێزگەها دهۆک، بەرهەمێن نیسکان و نوکان 70% کێمبوویە، ئه و نیسک و نوکێن دهێن چاندن ژى نەک بۆ بازرگانیێ نە، ژمارەکا جۆتیاران بۆ خوارنا خوە یا سالانە وان بەرهەمان دچینن.
زەلالکر:ئەگەر حکومەتا هەرێما کوردستانێ، سالێن بهێت، پلانەکا باش بۆ وەرگرتنا بەرهەمێن نیسکان و نوکان نەبیت، ئەڤ بەرهەمە دێ گەلەک کێمتر لێهێن، چنکو بتنێ نوکە ل چەند گوندێن کێم یێن دەڤەرا دوسکییان دهێنە چاندن.
لدۆر هەمان مژار، سەلام مزوورى، خۆدانێ قەپانا سەلام بۆ دواڕۆژ گۆت:بەرهەمێن نوکان و نیسکان ناچنە ژ دەرڤەى دهۆک، هەمان دەم گەلەک بەرهەمێن نیسکان و نوکان یێن بیانى دهێنە بازارێن دهۆک، لەورا بەرهەمێن نیسک و نوکێن دهۆک گەلەک کێمبووینە.
ئێک ژ ئەگەرێن دى یێن ئەڤ ساله، جۆتیارێن دەڤەرێ بۆ کێمبوونا بەرهەمێن نیسکان و نوکان دیاکرى، نەبوونا بارانێن گۆنجایی بوو، بتایبەت ل مەها نیسانێ.[1]