ژبەر بڕیارەکا حکومەتا وەلاتێ ترکیا بۆ هاتن و چوونا دەرگەهێ سەرزێرى رێژەیا گەشتییارێن باکوورێ کوردستانێ بۆ #زاخۆ# زێدەبوویە.
چیا ئەمین، رێڤەبەرێ گەشتوگۆزارا زاخۆ بۆ دواڕۆژ گۆت: بڕیارا حکومەتا ترکیا بۆ ڤەکرنا دەرگەهێ سەرزێرى بەرامبەر رێڤنگان و گەشتییاران ل هەموو رۆژێن هەفتیێ راستەوخوە کاریگەرى لسەر زێدەبوونا گەشتییاران ل قەزا زاخۆ هەبوویە.
ناڤبۆرى خوەیاکر: رێککەڤتنێن گەشتۆگۆزارا #دهۆک# ژى دگەل کۆمپانیێن گەشتییاریێن باژارێن (تەتوان، بەدلیس، جۆلەمێرگ، وان) دێ گەلەک مفای گەهینیت باژارێ زاخۆ، چنکو ژمارەکا گشەتییارێن وان باژاران دێ قەستا باژارێ زاخۆ کەن.
ناڤبۆرى خوەیاکر: زاخۆ خۆدان چەندین جهێن گەشتوگۆزارییە، رێڤەبەرییا مە دێ شێت ب باشترین رەنگ پێشوازیێ ل وان گەشتییاران کەت یێن ب رێیا دەرگەهێ سەرزێرى قەستا زاخۆ بکەن.
پتریا گەشتییارێن سالێن دەربازبووى قەستا باژارێ زاخۆ دکرن ژ ناڤەراست و باشورێ ئیراقێ بوون، رێژەکا کێم یا گەشتییاران ژ باکورێ کوردستان د رێیا دەرگەهێ ئیبراهیم خەلیل دهاتن زاخۆ.