$خانە محەمەد پاشا$ لە سنە وە وەردەەوام لە هەوڵ ئاوەدانکردن زیاتر و جوانتر و فراوانکردن شارەگە بویە، هەر لەوەر ئەوەیش یەکیگ لە زانایەیل پایەبەرز و ناودار ئه و سەردەم ئەردەڵانە وەناو (مەلا عەبدولکەریم) کلکرد ئەرا ئەستەمبوڵ لەوەر رەسانن هەواڵ سەرکەفتنەیلى و ئەنجامداین چەن کار و پرووژەیگ گرنگ و داواى بڕە پویلیگ دیاریکریاگیش لە سوڵتان کردگە.
دویاى ئەوەگ سوڵتان ئەحمەد فەرمان وە موفتیکردن ئەردەڵان ئەرا مەلا عەبدولکەریم دەرکردگە، دویاى ئەوە پویلیگ دیاریکریاگیش ئەرا خانە محەمەد پاشایش کلکردگە، ئەویش لەساڵ(1725ز)، و مزگفتیگ گەورا وە مەنارەى بەرزیگیشه و وەل خوەندنگایگ ئایینى لە شان باڵەخانەێ(دارولحکمە)ى شارەگە دروسکردگە، وە جووریگ ئه و مزگفت تا سەدەیگ دویاتریش هەر ئاوەدان بویە، وەلێ دویاخر جى داخە لەلایەن (ئەمانوڵڵا خان گەورە 1775-1824ز) والی ئەوساى ئەردەڵانه و رمیاگە ئەرا کوشاننەوەى شوونەوار بابانیەیل له و شارە، ئەویش وە مەهانەى دروسکردن باخ(فردەوس).
لەلایگ تریشەو، دویاى ئەوەگ وە بوونەىجەنگ و داگیرکارى و ئاژاوه و پشیوێ وەردەوام، میر مەحکمود ئەفغانى تویش نەخوەشى دەروینى بویە، سەرکردەیل ئەفغانى (میر ئەشرەف خان 1725- 1730) ئامووزایان لە ئەفغانستانه و هاوردنه و لە (مانگ 4 لەساڵ 1725 ز) تاج پاشایەتى بەشیگ لە خاک ئیران نانەسە سەرێ، ئەویش یەکەم کارێ کوشتن میر مەحمود بویە، چوینکە له و وەختەیلە نەتویەنریاگە هویچ ریککەفتن و پەیماننامەیگ وەل عوسمانیەیل ئمزا بکریەێد، لە وەرانوەر ئەوەیش دەوڵەت عوسمانى بڕیار دوبارە جەنگکردن دەرکردگە.
هەر لەوەر ئەوەیش لە پایز ساڵ (1726ز)، ئەحمەد پاشای والی بەغدا وە هیزیگ فریە گەوراى نزیکەى (70)هەزار سەرباز ک پیکهاتوێد لە عەرەب و تورک و کورد لە خوەڕەم ئاواوە چیە وەره و هەمەدان، ئمجا هەناى ئەشرەف خان وە هەواڵ ئه و پەلامارە زانستگە، ئەویش وە سوپایگ (17)هەزار سەربازیى ئەفغانى و دەرگەزێنى و ئێرانیه و وەره و روییان چیە.
له و وەختەیلیشە هیزەیل کورد لەناو سوپاگەى ئەحمەد پاشاى والى بەغدا نزیگەى(20)هەزار سەرباز بویە ک لەلایەن(20)میر کوردەوە سەرکردایەتى کریاگه و لەوانەیش: هیز خالد بەگ بابان و میر ئەوساى ئامێدى وەل گشت سەرۆک هووز و بەگەیل جوور(ئەحمەد بەگ میر درنە و دەرەتەنگ، عەلی بەگ میر باجەڵان، مستەفا بەگ میر هەریر، عەلی بەگ میر کۆیە، سەفی قولی بەگ میر جاف، حەسەن بەگ میر گەڕووس، سوبحان وێردی خان میری سەعد ئاوا، رەزا قولی بەگ میر کەلهوڕ، محەمەد بەگ میر زەنگەنە، حەسەن بەگ میر سەرتاس، ئەحمەد بەگ میر ئاڵتون کۆپری- پردێ‌، فەرهاد بەگزادە میر قەڵای قزڵجە، فەرهاد بەگ میر شار باژێڕ، حەسەن بەگ میر قەڵای سرۆچک و میر سەر چنار …)، ئەوانیش گشتیان لەلایەن خانە محەمەد پاشاوە فەرماندەیی کریانە.
دویای ئەوەگ ئەشرەف خان ئەفغان سەر شا سوڵتان حسێن سەفەوی بڕیە! کەلە سەرەگەی وەک هەڕەشەیگ کلکردگە ئەرا ئەحمەد پاشای والی بەغدا، دوياخر هەردوگ سوپای ئەفغانی و عوسمانی لە دەيشت (ئەنجدان) نناونى هەردوگ شار ئیسفەهان و هەمەدان چەن رووژێگ لە وەرامبەر یەکتری جەنگ کردنە. هەمان وەخت، ئەشرەف خان کەڵک لەو چەن رووژ ئارامییە وەرگرتگە و چەن کەسيگ لە باوەڕ وەپيکرياگەيل خوەى کلکردگە ئەرا ناو سوپاى عوسمانى وەتايبەت ئەرا لاى کوردەيل، ک دوياى ئەوەگ قەوڵ خەڵات و پويل فريەيگ و پلەوپايەێ(خان)ێتى وە ميرەيل کورد داگە! دوياخر لەلايەن ئەحمەد پاشاوە فەرمان پەلامارداين دەرکرياگە.
له و وەختە ک باڵ لاى راس سوپاگەى ئەحمەد پاشا، هيز ميرەيل کورد بويە، وەسەرکردايەتى خانە محەمەد پاسا، ئه و بڕيارە جيوەجێ نەکردنه و ئەوە دەرخستنە ک ئەوان دژ ئەفغانەيل سنى جەنگ ناکەن، هەر لەوەر ئەوەيش وەرجە دەسوەپيکردن جەنگەگە وە گشت سەربازەيليانه و لە مەيدان جەنگەگە خوەيان کيشانەسەو.
دەرئەنجام له و جەنگە ئەحمەد پاشاى والى بەغدا تويش شکەستيگ فريە خراو بويە، ئەويش وە جووريگ ک(12)هەزار سەرباز سوپاگەى کوشيانه و گشت بنگه و بارەگاو تووپخانەيلێ وەجێ هيشتگه و گلەوخواردگە ئەرا کرماشان.
دويای نزیکەی (3) ساڵ لەو روويداگەيلە، ئمجا (نادر قولی خان)ی سەرۆک هۆزی ئەفشاری تورکمان ک دوياتر لە ناونى ساڵەيل (1736-1747ز) وە (نادر شای ئەفشار) لە ئێران ناو دەرکردگە، بويەسە سەر لەشکر سوپای سەفەوی و تويەنستگە ساڵ (1729ز) هەردوگ شار هەمەدان و کرماشان لە ژير دەسەڵات عوسمانیەيل قورتار بکا.
هەناى ک ئه و هەواڵە رەسيەسە(باب عالى)، فەرمان وە هەردوگ وزير(مستەفا پاشا)ى والى ديار بەکر - ئامەد و (حسێن پاشا)ى والى سيواس و هەر يەک لە مير ميرەيل(ئبراهيم پاشا)ى موتەسەڕف مەرعەش و(سەليم پاشا)ى موتەسەڕف ئەماسيه و (حسێن پاشای جەلیلی) والی موسڵ کردگە وە سەرکردایەتی ئەحمەد پاشای والی بەغدا وەرەو ئێران بکەفنە رێ‌ ئەرا نواگرتن لە پەلامار زياتر سوپاى سەفەويەيل. ئەەويش دوياى ئەوەگ ئەحمەد پاشا دەس کردەسە گردەوکردن سوپايگ لە ناوچەيل جياجياى عراق و هەواڵ ئەرا خانە محەمەد پاشاى بابانيش کلکردگە وە هيزەيل خوەيه و ئامادەى ئه و جەنگە بوون، وەلێ له و وەختەيلە هەواڵ مردن سوڵتان (ئەحمەد سێیەم 1703-1730ز) عوسمانی بڵاو بويەسەو، دويای ئەویش سوڵتان (مەحموودی یەکەم1730-1754ز) شوونی گرتگە. لەوەر ئەوە پيشڕەوێ سوپاى ئەحمەد پاشاى والى بەغدا وە مەرام چەوەڕيکردن فەرمان سوڵتان تازە ئەرا ماوەى(3)مانگ لە شارەزوور وسياگە. دوياى ئەوەگ دوبارە کرماشان داگير کردنەسه و وەره و هەمەدان پيشڕەوێ کردنه و لە دەورگرد ئه و شارە وەل سوپاێ شا(تەهماسبی دووەم1722-1732ز)سەفەوی جەنگ گەورايگ رويداگە.
ئمجا خانە محەمەد پاشا دويای (4) ساڵ فەرمانڕەوایی سنە، ساڵ (1727ز) گلەوخواردگە ئەرا قەڵا چوالان و (عەلی بەگ)ی کوڕی لە شوون خۆی بەجێهێشتگە ئەرا وەڕيەوبردن کاروبار رووژانەى هاووڵاتيەيل و (جوانمێر ئاغا)ی باپیرە گەورای (عەبدولقادر رۆستەم بابانی)يش وەک راوێژکاروەليا هيشتەسەو.
وەگوورەى سەرچەوەيل مێژوویی، دويای ئەوەگ ساڵ (1732ز) خانە محەمەد پاشا داوا کرياگە ئەرا بەغدا، وە مەهانەى ئەوەگ ساڵ (1726ز) لە جەنگ دژ میر ئەشرەف ئەفغانی خیانەت لە ئەحمەد پاشای والی کردگە، وە فەرمان خودی والی بەغدا و لە شیرینی خەوا لەلایەن چەن کەسيگه و خنکنرياگە! دوياتریش لە رێ وڕەسميگ تایبەت و فراوان تەرمەگەی هاورياسه و ئەرا کوردستان، لەوەر ئەوەگ موريد (شێخ سمایلی عەوداڵان) بويە، هەر وه و خاتريشە لەشان قەورەگەيه و لە ئاوايى (عەوداڵان) ناوچەی چەم رێزان بە خاک سپارياگە.[1]