هۆنەرێکی شاری #مەهاباد# ی ڕۆژهەڵاتی کوردستانە. چالاکی بواری ئەرشیفکردنی مێژووی نەتەوەیی کوردە.[1]
موحیب مەهابادی شاعیر، لێکۆڵەر و ئەڕشیڤسازی کورد له ڕۆژی پازدەی گەلاوێژ له ڕێکەوتی 1983-08-06ی زایینی لە شاری مەهاباد له بنەماڵەیەکی خانەدان و ڕەسەن بەناوی سۆفیزادە له دایکبووە و خاوەنی ماجستێری دەروونناسییه و تا ئێستا دو، کتێبی بە ناوەکانی دیوانی(کوردی سۆزی دڵ) و دیوانی فارسی (ئەهلی دڵ) لەچاپ دراوە و پێشوازییەکی زۆری لە لایەن ئەدەب دۆستان و هۆگرانی لێکراوە و دوو کتێبی تریشی ئامادەی چاپن کە بەداخەوە بەهۆی ئەوەی کە لەسەر ڕێفڕاندۆمی کوردستان له ئێران گیراوە و دوایی هەڵوەدا بووە بۆ شاری #هەولێر# نەیتوانیوە بەسەمەریان بگەیێنێت، موحیب مەهابادی دەیان وتاری له ڕۆژنامە و گۆڤارەکان بڵاو کردۆتەوە و له چەندین میدیا و ڕادیۆ داوەت کراوە و بەرنامەی هەبووە و کەسێکی چالاکە له پەیجەکانی ئەنتەرنێت و ناسراوە له وڵات و سێ ساڵە مودیر مەکتەبی تاقه کوڕی #پێشەوا قازی محەمەد# یەکەم سەرۆک کۆماری کوردستانە و بە هیوای ڕزگاری وسەربەخۆییە بۆ نیشتمان و دەتوانین ئەوە له هۆنراوەکانی دا بە ڕوونی ببینین و هەر وەها چەندین شێعری موناجاتی و ئەویندارانەی تا ئێستا لە لایەن هونەرمەندان و گۆرانیبێژانی کورد کراون بە ئاواز و گۆرانی، شایانی ئاماژەیه کە موحیب مەهابادی له خزمانی نزیکی شاعیری گەورەی کورد مامۆستا #وەفایی#ه و بنەماڵەکەی له کەسایەتی و تاجرانی بەناوبانگی مەهاباد و #موکریان# بوون.
موحیب مەهابادی دوو ساڵە وەک نووسەر و وەرگێڕ له کەناڵی میدیایی کوردستان تیڤی کار دەکات، بۆ لێژنەی سەرپەرشتیی یەکەمین فیستیڤاڵی(ڕامان ) هەڵبژێردراوە کە لەساڵی 2023 له #هەولێر# ی پایتەختی هەرێمی کوردستان و بە بەشداری ئەهلی قەڵەم و ئەدەبی هەر چوار پارچەی کوردستانەوە بەڕێوە چووە، شایانی باشه یاریدەدەری کوردیپێدیایە بە وێنە و ئەڕشیڤ و بەڵگەیی مێژوویی، بەردەوام هاوکاری سایەتەکەمان دەکات.
هەندێک لە هۆنراوەکانی:
هەموو کۆشکی دنیایه کاول دەبن
له نوێ بوون بەرەوڕووی نەبوونێ دەچن
لە هۆنراوە کۆشکێکی بونیاد ئەنێم
بە یادگاری هەرمان و بۆ یاد ئەنێم
کە خۆی تاهەتایه و دەمێنێتەوە
دڵی عاشقان پێی دەلاوێتەوە
هەزاران گوڵ و باغی تازەی هەیه
کە جێژوانی هەستە و نیشانی مەیه
دەوورنتان لەوێ پڕ له سوکناییه
لە لایەکی تر ماڵی تەنیاییە
چ تاک بن، چ هاوڕێی کەسانێکی ژیر
لە دیوانی کوشکم نەبوون زار و پیر
بەئەزموون دەبی بەس هەمیشەی تۆ لاو
تەواو سۆز و عەشقه هەناسە و هەناو
نە وێران ئەبێ کۆشکی شێعری تەڕم
نە قەت کۆن ئەبێ، وایه هەر باوەڕم
شوکر خوایه بەو نێعمەتەی دات به من
له پاش کۆچی دواییش موحیب نابێ ون!...


=KTML_ImageCaption_Begin==KTML_StyleDiv=width:30%;height:20%;float:right;=KTML_ImageCaption_Target_Link=https://www.kurdipedia.org/files/relatedfiles/2020/376761/0001.JPG=KTML_ImageCaption_Title=موحیب مەهابادی=KTML_ImageCaption_CaptionStyle=000000=KTML_ImageCaption_Caption=موحیب مەهابادی=KTML_ImageCaption_End=
.......
نییه جێگای قسە و ڕاوێژ و پاساو
ئەتۆی دەریا و ئێمە بڵقی سەر ئاو
خەیاڵین، ڕاستی بەس بوونی خۆتە!
هەموو هیچین و ژین خەونێکی پاراو
جیهان خوڵقا بە ئێمایەکی نازت
بە یەک مۆڕەش دەدەی تێکی لەناکاو
لە شەش لا شوێن و کاتی کائیناتی
دڵم سەرخۆش و شێتە عەقڵی داماو
ونی و دیاری، نزیکی و دووری، یاهو
بە بێ پاساو موحیببه حاڵی تاساو...

........
شەوی زستانێ
سەختە باوەڕی
تین و گڕی
لای نیوەڕۆی هاوین!
دەلەرزین
وا له داخ سەرما
تەزیوین
مات و سڕ ماوین

بەڵێ ئێستاش له بۆ خەڵکی
وەکوو خەونێکی بێ ڕەنگە
بەڵام من ئاشکرا لێم دیاره
ئاڵای بەرزی کوردستان
بەرانبەر چوارچرای پیرۆز
شنەی فێنکی شەماڵ
دەیبات و دەیهێنێت و
جارجار خۆرەتاوی
وا بەناز پەیدا دەبێ پڕسۆز!

خەیاڵ و ڕاستی هەردووک
لەیەک سەرچاوە هەڵدەقوڵن!
لە بیرت قەت نەچێ هەرچی
کە بووی پێداگری و ویستت
بە بێ شک پێیدەگەی گەرچی
مەحالیش بێ لەسەر دنیا و
بڵێن هەرگیز بەدەست نایه
مەترسێ تا ئومێدت بەس
بە لوتف و گەورەیی خوایه!...

..............
ئەی خەیاڵ گەر تۆ نەبای چۆن یاری دوورم دیتبا
چۆن له ئامێزم گوڵی بۆن خۆشی سوورم دیتبا
چۆن له ژوانی باسەفای دڵ کاتی تەنیایی خەمۆش
دڵبەری بێ مەیلی ساردی پڕ غوروورم دیتبا
ئەی خەیاڵ مەمنوونی تۆم سوکنایی دونیامی لە ژین
چۆن بە بێ تۆ لەو شەوانی قەدرێ نوورم دیتبا
چۆن له تەکیەی عاشقان چووبامه مێعڕاجی دەروون
چۆن تەواوی داستانی کێوی توورم دیتبا
چۆن فڕیبام وا له کوردستان به دیداری کەسان
تۆ بڵێ چۆن بێ تۆ نالی و شارەزوورم دیتبا
ئەی خەیاڵ ئەی مەحڕەمی شاعیر له ڕۆژگاری تەمەن
چۆن به بێ تۆ من پەری گەردن بلوورم دیتبا
چۆن و چۆن و سەدهەزاران چۆنی دیکەش بوون و هەن
چۆن له ئاوێنەی دڵم ئیلهامی ژوورم دیتبا
گیانە سەد دەفتەر کەمە بۆ وەسفی جوانی و خزمەتت!
بێ تۆ چۆن خۆش خەڵوەتێکی پڕ سروورم دیتبا
ئەی خەیاڵی خۆشەویستم خۆت موحیبت پێگەیاند
بێ تۆ چۆن ڕووحی ئەوینی بێ سنوورم دیتبا؟
.. [2]