موحسین شێخ عەبدولکەریم، بەڕێوەبەری گشتی کاروباری مین لەپارێزگای #سلێمانی# ڕۆژی 07-01-2020 لەکۆنگرەیەکی ڕۆژنامەوانیدا ڕایگەیاند: لەساڵی ڕابردوودا کۆی گشتی کاری ئەنجامدراویان بە مەتر دووجا 653 هەزار و 157 ڕووبەر بووە، چوار هەزار و 924 مین و تەقەمەنییان لەناو بردووە، هەروەها 9 مین تەقیونەتەوە کە 9 قوربانی لێکەوتۆتەوە، 3 شەهید و 6 بریندار هەبووە لەگەڵ 2 بریندار لەکارمەندانی بەڕێوەبەرایەتییەکەیان، هەر لەساڵی ڕابردوودا 35 کێڵگەی مینیان ڕادەستی خاوەنەکانیان کردۆتەوە کە دەکاتە نزیکەی 750 هەزار مەتر دووجا.
ژمارەی ئەو کەسانەی بەتەقینەوەی مین گیانیان لەدەستداوە زیاترە لەژمارەی شەهیدانی پارێزگای #هەڵەبجە#، بەجۆرێک لە 29 ساڵی ڕابردووەوە تائێستا لەسنوری پارێزگاکانی سلێمانی و هەڵەبجە شەش هەزار و 31 کەس بەڕووداوی تەقینەوەی مین گیانیان لەدەستداوە و هەزار و 496 کەسیش بریندار بوون.
موحسین عەبدولکەریم ڕوونیکردەوە: هەر لە 29 ساڵی ڕابردوو تائێستا لەسنوری پارێزگاکانی سلێمانی و هەڵەبجە ڕووبەری 267 ملیۆن 703 هەزار و 230 مەتر چوارگۆشە مین هەبووە، لەوەش ڕووبەری 77 ملیۆن و 815 هەزار و 419 مەتر چوار گۆشە پاککراوەتەوە و ڕووبەری 184 ملیۆن و 887 هەزار و 811 مەتر دووجاش ماوەتەوە.[1]