هادی حەبیبی (شاعیر و نووسەر و وەرگێڕ) ساڵی 1980 لە شاری #بۆکان# ڕۆژهەڵاتی کوردستان لە دایک بووە. بەکالۆریۆسی مافی لە تاران وەرگرتووە. لە شێعر و ڕەخنەی ئەدەبیدا چالاکی بووە و گەلێک بابەت و وتاری ڕەخنەیی لە گۆڤارەکانی ناوخۆ و دەرەوەی وڵاتدا بڵاو کردۆتەوە. لەگەڵ ئەوەشدا ویراستاری گەلێک لە بەرهەمی نووسەرانی ڕۆژهەڵاتی کوردستانی ئەنجام داوە، کە دیارترینیان: ڕۆمانەکانی مامۆستا فەتاح ئەمیری، شەرحی مەحوی سەعید نەجاڕی، کۆی بەرهەمە شێعرییەکانی #ئەمین گەردیگلانی# و دەقی فارسی بۆکان لە سەدەی بیستەمی ڕەحمانی محەممەدیانن. هادی حەبیبی هەروەها لە بەستێنی غەزەلی نوێی کوردیدا، بە شێوازێکی کارامە چالاکی نواندووە و کۆمەڵە غەزەلی (هەر خەمێکم پاییزێکە) بەهرەی ئەم تێکۆشانە شێعرییەیە. شێعری هادی حەبیبی هەتا ئێستا لە لایەن سترانبێژی ناسراوی وەک #بیژەن کامکار#، مەسعوود یارە و سەلاح مەنووچێهری کراوەتە گۆرانی.
$بەرهەمەکان:$
ڕازی مانەوەی خاک (شێعر و ژیانی مارف ئاغایی)، کۆکراوەی هادی حەبیبی، بەڕێوەبەرایەتی ڕۆشنبیری ڕامان، #هەولێر#، 2008
پێکەنینی گەدا لە ئاوێنەی ڕەخنە و بۆچووندا، (دەقی چیرۆکەکانی حەسەن قزڵجی)، پێشەکی و پێداچوونەوەی هادی حەبیبی، ئامیار، #سنە#، 1395
دیوانی حەقیقی، لە چاپ دانەوە و پێداچوونەوەی هادی حەبیبی، ئامیار، سنە، 1397
کاتژمێر چوار (کۆمەڵە چیرۆکی بیانی)، وەرگێرانی هادی حەبیبی، ئامیار، سنە، 1398
ئەحمەد موختار جاف (شاعیری نێرگسی چاو و پەرچەمی زوننار)، پێشەکی، شەرح و لێکۆڵینەوە: هادی حەبیبی، ئامیار، سنە، 1398
نیشتمانی ڕوو لە مەرگ (14 کورتە چیرۆک لە 7 نووسەری بەناوبانگی عەڕەب)، وەرگێڕان لە عەڕەبییەوە: هادی حەبیبی و دوکتۆر ئازاد موونسی، ئامیار، سنە، 1398
هەر خەمێکم پاییزێکە (کۆمەڵە غەزەل)، هادی حەبیبی، ئامیار، سنە، 1400
$نموونە شێعرییەکان:$
1
گوڵی بەستێنی ئەشق بووم و لە شێعرا شین بووم
سروەئاسایی خەمت، ڕۆحی خەیاڵی بردووم
شەو بە فرمێسکەوە، سووتانی پەپوولەم ناسی
بەژنی ڕووشاوی بەهاران و چیای تەم گرتووم
تکە ئەسرینی قەتیس ماوی گوڵی سەر گۆنام
باغی ئاواتی بەجێماوی، گەڵا با بردووم
خەمی کانیمە، هەموو ویشک و دەروون سووتاون
چاوگەیان بۆتەوە لافاوی خەمی ڕابردووم
غەزەلم بەڵگەیە بۆ ئەشق و ژیان و هەرمان
هەستی نەخشاوە بە بارانی، لە ئامێز گرتووم
پرچی هاڵۆز و لەشی سەردە وەکوو ڕوو، چەرپام
بێ خەو و ئۆقرە، بە دڵتەنگی لەگەڵیا نووستووم
چوار شکۆفەم کە بە خوێناوی تەمەن دێرابوو
ڕەشەبای جەردە، هەموویانی لە ژێر پێ خستووم
دڵ پەرێشان و غەزەل حەسرەت و دەفتەر وێران
واژە بێدەنگ و قەڵەم دیلی سکووتێکی شووم
بەو هەموو نەردە، کە تاریکی بە ڕوویدا کێشام
من بە پرشنگی خەیاڵی شەوی بسکت، زیندووم
پاییزی 92
2
بە دڵی کەیلم، دەروونی پڕ سۆم
یەگجار پەرۆشی ئەوینەکەی تۆم
وێنەت دەگرمە قاپی خەیاڵم
تینووی دەمێکە، جامی بەتاڵم
یادی ئەو ڕۆژەی، بە جووت لە جێژوان
لێو پێدەکەنین، چاومان دەگریان
ئەو دڵۆپ ئەشکەی، لە چاوت دەتکان
ڕچەی بۆ باخ و گوڵستان دەشکان
بەو زارەی دیسان، بەڵێنیت پێم دا
ئەسرین لە من و گوڵ لە تۆ دەڕژا
ئەو دڵە گەرمەی، بەخشیوتە بۆخۆت
بە گلێنەی چاو، دەیپارێزم بۆت
هاتی بەهاری سەوزت، لە دوو بوو
هەتاوی گەرمی ئەشقت، لە ڕوو بوو
شکۆفە لە باخ، شەونم لە کوێستان
بۆ سەیری جوانیت، زوو لە خەو هەستان
زەنوێر و هەور و کانی و نەمامان
یەک دەنگ دەڵێن: یار هاتەوە لامان
پاییزی 94
3
چەند به نامۆیی، له بۆسەی بێکەسیدا مامەوه!
وەک تکەی ئاونگی سەر کوڵمەت، به تەنیا مامەوه!
سارد و بێ ڕەنگه و کەسیرە، تیشکی تاوی ئارەزووم
ڕۆحی من ڕووبار و سەرگەردانی دەریا مامەوه
لەو شەوه تاره و له نێو نووری مەراق و خۆزگەدا
یەک تەمەن سووتام و هەڵقرچام و شەیدا مامەوه
بێ بەزەن ڕووداوی ڕۆژگار و دەروون کەیلی خەمن
مەی بەتاڵ و دەست به زام و چاو له ڕێگا مامەوه
تۆفی دڵتەنگی، بەهاری ژینی ژاکاند و ئەمن
ژیلەمۆ بووم و به سروەی سەوزی هیوا، مامەوه
دڵ هەموو گۆڕان و کەس دەروەستی دڵداری نەما
من به نەغمەی ئەشک و داغی دیده، هەروا مامەوه
پێم له داوی مەینەتا، مات و بەجێماو و ئەسیر
ئاشقێکم هەڵوەدا، مەجنوونی لەیلا مامەوه
زستانی 95
4
ژیان، ژیان، هەمووی هەر ئاهی سەرد و هەر کڕێوە بوو
بەهاری شۆخ و نازەنین، نەهات و هەر بەڕێوە بوو
لە باغی پڕ لە چۆلەکەی خەیاڵی تۆ، حەسامەوه
بزەی بەهاریی تۆ گوڵم! شەپۆلی شێعری پێوە بوو
ئەوەی لە تاڵترین شەوانی بێ سنوور توامەوە،
هەموو بە یادی ئەو نیگارە شۆخ و شیرنەشێوە بوو
لە شاری پڕ گزە و درۆ، ژیام و بێ وەفا نەبووم
وەفام، هەڵۆی ئەسیری ئەو تەلان و ڕژد و کێوە بوو
مەڕەنجە لێم کچۆڵەکه! کە بوومە شاعیری مەمت
هەموو خەتا لە نەوسی ئەو زمانە دەست بزێوە بوو
وەرن پەپوولەکان! لە دەوری مۆمی واژە بسرەون
هەمیشە پەنجەرەی غەزەل، بەرەو نیگاهی ئێوە بوو
سەیر نەبوو وەتاغی بێکەسی، مەکۆی پەژارە بێ
کە دڵ لە داوی ئەشقی هەرچی چاوی کاڵە، پێوە بوو
سروشت و بەندەن و چیا، لە مێژە دەوری یەک دەدەن
بەهاری شۆخ و نازەنین، نەهات و هەر بەڕێوە بوو
زستانی 91