بە ناوی خودای مەزن و دلۆڤان
ئەمڕۆ هەشت ساڵ بەسەر پەلاماری تیرۆریستان بۆ سەر #شنگال# تێدەپەڕێت. تاوانی جینۆسایدی شنگال برینێکی قووڵە لەسەر جەستەی گەلی کوردستان. لەم کارەساتەدا خوشک و برا ئێزیدییەکانمان بەهۆی کوردبوون و بەهۆی ئایین و بیروباوەڕییان کەوتنە بەر شاڵاوی تیرۆریستان. ئەوەی تاوانبارانی داعش لەدژی خوشک و برا ئێزیدییەکانمان ئەنجامیان دا درێژەکراوەی ئەو زنجیرە کارەسات و تاوانانە بوو کە بە درێژایی مێژوو لەبەرانبەر گەلی کوردستان ئەنجام دراوە.
لە یادی کارەساتی کۆمەڵکوژیی شنگالدا جێگەی داخە سەرباری بوونی ڕێککەوتنی نێوان حکوومەتی هەرێم و حکوومەتی عێراق لەمەڕ ئاییندە و بەڕێوەبردنی شنگال، هێشتا ڕێککەوتنەکە جێبەجێنەکراوە و، شنگال لە دەستی کۆمەڵێک هێز و چەکدارە کە ڕێگربوونە لە گەڕانەوەی خەڵک و ئاوەدانکردنەوەی شنگال. هەنگاوی یەکەمی سارێژبوونی برینی شنگال، ئەوەیە شنگال بگەڕێتەوە دەست خاوەنە ڕەسەنەکانی و ئەو هێز و میلیشیانەی دەستیان بەسەر شنگالدا گرتووە واز لە شنگال بهێنن و، ڕێککەوتنی شنگال جێبەجێ بکرێت. هەروەها پێویست دەکات ڕێوشوێنی وا بگیرێتە بەر کە چیتر کارەسات و زوڵم و تاوان لەدژی ئێزیدییەکان و پێکهاتەکانی تر دووبارە نەبێتەوە.
لەم یادە دڵتەزێنەدا بە بەرزی یادی شەهیدان و قوربانیانی شنگال دەکەینەوە. هاوکات یادی ئەو شەهید و پێشمەرگە قارەمانانەیش دەکەینەوە کە بە خوێنی خۆیان چیای شنگالیان پاراست و ئابلۆقەی تیرۆریستانیان لەسەر چیای شنگال تێکشکاند و شاری شنگالیشیان لە دەست تیرۆریستان ئازاد کرد و، سەرئەنجام مەردانە ئەفسانەی داعشیان تێکشکاند و، سەری تیرۆریستانی داعش کەوتە ژێر پێی کوردانی ئێزیدی. [1]
#مەسعود بارزانی#
03-08-2022