ئەڤرۆ، شاکر ئەتروشی
پشکا رەوشەنبیری ل ناڤەندا خانی یا رەوشەنبیری و راگەهاندنێ، ب هەڤکاری ل گەل (نۆبارا جەعفەر مایی) دوهی ئێڤاری27/6/2022 د رێ و رسمەکێ ژ هەژی دا ل هولا نالبەند ل پانۆرما ئازادی، ئەنجامێن بەریکانا چیرۆکێ یا گەنجان راگەهاندن و هەرسێ سەرکەفتیێن بەراهیێ هاتنە خەلاتکرن، کو ئه و ژی ئەڤە بوون: دلبرین عەبدولفەتاح بۆتانی سەرکەفتیا ئێکێ و عادل حسێن سەرکەفتیێ دویێ و رزگار سالح عەجاج سەرکەفتیێ سێیێ.
نڤیسەر و رۆژنامەڤان (ئیسماعیل بادی) ب نووراتیا ناڤەندا خانی یا رەوشەنبیری و راگەهاندنێ، د پەیڤەکێ دا گۆت: هزرا ئەنجامدانا ڤێ بەریکانێ یا خودێ ژێ رازی جەعفەر مایی بوو، ناڤەندا خانی خوە لێ کرە خودان و مە دەست ب ئەنجامدانا ڤێ بەریکانێ کر و مەرەم پێ ئه و بوو ئەم وەکو ناڤەند خوە ل بەرهەمێن گەنجان، ب تایبەت ژی چیرۆکنڤیسێن گەنج بکەینە خودان، هەروەسا پشتەڤانیێ لێ بکەین، لەورا ئەڤ بزاڤە دێ دبەردەوام بن و بۆ دەمێ بهێت دێ مە پرۆژەکێ دی ژی هەبیت، بۆ زانین وەک ناڤەندا حانی هەتا نوکە مە پتری چل پرتووکان چاپکرینە و نوکە ژی هندەک ل ژێر چاپێ نە.
دووڤدا هەلبەستڤان مەحفۆز مایی، برایێ خودێ ژێ رازی جەعفەر مایی د پەیڤەکێ دا بەحسێ رۆلێ رەحمەتی کر د پێشخستنا بزاڤا رەوشەنبیری ب تایبەت گەنجان و هیڤی خواستن کو ئه و ژی لڤێ چالاکیێ یێ بەرهەڤبا لێ ژبەرکو وەغەرکریە ئه و وەکو برایێ وی هاتیە.
موسەدەق تۆڤی، بەرپرسێ پشکا رەوشەنبیری ل ناڤەندا خانی یا رەوشەنبیری و راگەهاندنێ د پەیڤا خوە دا گۆت: پشتی مە راگەهاندنی کو دێ ئەڤ بەریکانە هەبیت (16) گەنجان چیرۆکێن خوە بۆمە هنارتن و ژلایێ سێ چیرۆکنڤیسێن بەرێز ڤە، کو ئه و ژی ( ئەنور محەمەد تاهر و حەکیم عەبدوللا و عسمەت محەمەد بەدەل) بوون هاتینە هەلسەنگاندن، د ئەنجامدا دلبرین عەبدولفەتاح بۆتانی بۆ سەرکەفتیا ئێکێ و عادل حسێن بۆ سەرکەفتیێ دویێ و رزگار سالح حەجاج بۆ سەرکەفتیێ سێێ، دووڤدا چیرۆکێن وان هەرسێ سەرکەفتیان ل گەل چیرۆکێن حەفت پشکدارێن دی کو هەموو دبنە دەه چیرۆک کرنە پرتووکەک ب ناڤێ ( ژبەرهەمێن گەنجان، سەرکەفتیێن بەریکانەیا چیرۆکنڤیسێن گەنج) چاپکر و ئەڤرۆ بەلاڤکر و سوپاس بۆ لژنا هەلسەنگاندنێ کو ب دلسۆزانە کارێ خوە ئەنجام دان.
دووڤدا چیرۆکنڤیس عسمەت محەمەد بەدەل، ئەندامێ لژنا هەلسەنگاندنا چیرۆکێن وێ بەریکانی ب روونی بەحسێ چاوانیا وەرگرتن و هەلسەنگاندنا وان چیرۆکان کر و گۆت ژبلی هەر سێ سەرکەفتیێن بەراهیێ شەش کەسێن دی ژی چیرۆکێن وان دباش بوون.
ل دووماهیێ خەلاتێ ناڤەندا خانی ل سەر سەرکەفتی و پشکدار و لژنا هەلسەنگاندنێ هاتنە بەلاڤکرن و کەنالێ #دهۆک# تیڤی ب شێوەکی زیندی ئەڤ چالاکیە د ڤەگوهاست.[1]