کورتە چیڕۆک
کۆرە ڕێکە و ڕێبارەکی کەسەکی بێ هیڤی و ئومێدە، ئەڤ کەسێ بێ هیڤی و ئومێد و بێ زاربووی ژ بێ خوەیی و خودانی د هەمی دەمان و ل هەمی جهان ڕێبارە و دچت و هەر دچت . . !
ل وارەکی ئارام و بێ ئارێشە دگەرهت.
هەر دڤێ گەریانا بێ دووماهیک دا، ل چوار ڕیانەکا پڕ ئاستەنگ و ڤالە ژ هاتن و چوونا مڕۆڤان ل قورنەتا جیایەک ئاسێ و دبن دار مازییەکێ پیرەژنەکا ژ خوە پیرتر و بێ ئومێدتر ژ هیڤیان دبینت، ب گرنژین ڤە و ب ئەزمانەکی نەرم و شرین ب ئێڤار باشەکێ سلاڤ دکتێ، پیرێ ب هەمی خەم و دەردێن خوە یێن گران ڤە ب دل خوەشی و گڕنژین ڤە بەرسڤا سلاڤا وی ددت وسلاڤێ ژێ وەردگرت، ئەڤ هەردو بێ ئومێدە کەفتن دانوستاندنا و سوحبەتێ . . گۆتن و سەرهاتیێن ئەڤێ فەلەکا ژیێ وان هەمی بێ بها و بێ ڕوومەت و مفا ژوان قەتیاندی و بۆراندی. ڤی کەسێ بێ ئومێد و هیڤی گۆت: پیڕێ تە خێرە ل بنێ ڤی چیایی و بنێ ڤێ دارێ ڕوونشتی؟ کا بۆتە چ بکم ؟ تە چ پێویست و چ داخوازی تە هەنە بۆ تە بکم ؟
پیرا هەژار ب دلەکی بریندار گۆت: دێ بۆ تە بێژم بەلێ کا بێژە من تە خێرە تو ل چ دگەرهی و دێ کیڤە چی؟
ڤی کەسێ بێ ئومێد گۆت: پیرێ ئەز گەڕۆکێ بێ مال و وارم بێ کەس و بێ خوەدانم، ڕێبارەکی بێ هیڤی و ئومێدم نزانم دێ کیڤە چم ! بێ ناڤ و نیشانم و بێ وارم دچم و هەر دچم ! دێ پیرێ درەنگە ڕێیا من دوورە و کەرەمکە تە خێرە؟
پیرێ دلێ خوە ئارام دکت و ب دلەکی تژی خەم دبێژت: ڕێبوارێ دەلال، ئەڤ دارا ل سەرێ ڤی چیایێ بلند و ب لات و کەندال و هۆ ئاسێ و بێ دەلیڤ و ڕێ ، بەرانبەری گوندێ مەیە، دارەکا کەڤنارە و ژ کەڤن وەرە پیڕۆزە ناڤێ وێ ( دارا ئومێدا ) یە، ب دەستێن کەنج و لاوان دهێتە کەزاختن و کۆلان و ئاڤدان، لێ مخابن مە ل گوندی گەنج نەماینە و گەنجێن مە ژ گوندی رەڤینە و گوند هێلاینە، ژبەر زۆڕداریا مەزنێ گوندی و هنەک ژ وانان ژ بۆ ئارەزوێن خوە یێن ژ گوندی دوور کەفتین، ئەڤ دارە یا بێ ڕەنگ و خەمل مای، چ نەمایە هشک ببت ، هەر ژبەرێ وەرە مە لاڤ و داخواز ژ خوەدایێ دارێ دکرن، مە بپارێزت ژ نەخۆشی و ئازار و دەردان، لێ دیارە خوەدایێ دارێ یێ ژ مە تۆڕە و عنڕی، یێ ژمە دل نەخوەش بووی ، ژبەرکو ئەڤە چەند سالن ئێدی گوهداری و چاڤدێری یا ڤێ دارێ ناکین و مە یێ پاشگوه ئێخستی، ئەڤجا زوڵم و زۆڕی و ئێش و نەخوەشی یێ دناڤ مە دا بەلاڤ بووین و چ چارە و جارەسەری نینن بو ئێش و دەردێن مە، له و ئەزا هاتیم و ژبەرکو مە چ گەنج نەماینە ل گوندی! من ژی ئه و هێز و شیانە نە ماینە بگەهم دارێ و جارەکا دی وەک بەرێ ڤێ دارێ بخەملینم، بەلێ دێ چاڤەڕێبم هەتا مرنێ، بەلکی و ( دارا ئومێدا ) جارەکا دی گەش ببت و گوندێ مە ئاڤا ببت.[1]