رێڤەبەرێ کاروبارێن ئێزدیان ل پارێزگەھا دھۆکێ بۆ ئەڤرۆ ڕاگەھاند کو، بەری ھەیامەکێ بازرگانەکێ جۆھی ب ناڤێ ستێف وەسا خوە دا دیارکرن کو وی گەلەک کچ و ژن و زارۆ ژ دەستێن ڕێکخراوا تیرۆرستی یا داعش ڕزگار کرینە و گۆت: لێ پشتی مە پێداچوون لسەر ڤێ چەندێ کری وەھا دیاربوو کو چو ڕاستی بۆ ڤێ بازرگانیێ نینە و ستێفی چو ڕەڤاندیێن ئێزدیان قورتال نەکرینە.
ھادی دوبانی ڕێڤەبەرێ کاروبارێن ئێزدیان ل پارێزگەھا دھۆکێ دیارکر کو، ئەڤی بازرگانێ جوھی بازرگانی ب کەیسا ئێزدیان دکر و گۆت: بو زانین پشتی ئەم گەھشتینە نوونەرێ وی بازرگانێ جوھی وی گوتیە مە 128 کچ و ژن و زارۆ ڕزگار کرینە و پشتی پێداچوونێن ھوور لسەر بابەتی ھاتینە کرن ئاشکرا بوو چو ڕاستی بۆ نینە و چو وەلاتیێن ڕەڤاندی ژ دەستێن تێرورستان ڕزگارنەکرینە.
ھادی دوبانی خویا ژی کر، بتنێ ناڤێن 18 کەسان لگەل وی بازرگانی بوون ژ وانا ژی ھەموو ب ڕیێا نڤیسینگەھا کاروبارێن ڕەڤاندیان ل دھۆکێ یێن ھاتینە ڕزگار کرن و وی بازرگانێ جوھی چو ڕۆل د ڕزگارکرنا واندا ژی نەبوویە و گۆت: بتنی وی بازرگانی ھندەک وینەیێن دگەل ڕەڤاندیان گرتین و کوژمەکێ پارەی یێ کیمە یێ دایە ھندەک ڕەڤاندیان و ئەو پسولێن وی بازرگانی بۆ خەلکی چێدکرن ژی ھەموو ب زمانی ئینگلیزی بوون و خەلکی ژی ئەو ھزر نەدکر کو چو ڕاستی بۆ نینە و وی بازرگانی د پسولێن خوەدا دیارکریە کو وی ئەو ژن و کچ یێن ڕزگار کرین و کوژمەکێ پارەی د پسولێن خوە دا نڤیسیە ب بەھانەیا وێ چەندێ کو وی ئەو کوژمێ پارەی یێ ل ڕزگارکرنا وان مەزاختی.
دوبانی گۆتژی: داخوازێ دکەین پێداچوونەکا ھوورتر لسەر وی بازرگانێ جوھی بھێتە کرن و ڕێگری لێ بھێتە کرن ھەتا ئەو بازرگان نەھێت و بەلگەناما ئاشکرا نەکەت کا وی چو ھەیە چونکی نابیت فێل ل ڕەڤاندیان بھێتە کرن.
ھادی دوبانی ئەو چەندە ژی دا زانین، ئەو بازرگانێ بازرگانیێ ب کەیسا ڕەڤاندیێن ئێزدیان دکەت ھەلبەت چەندین ڕێکخراو و کەساتیێن دی ژی ھەنە بڤێ چەندێ ڕادبن و پێدڤیە کەیسا ڕەڤاندیان بتنی د دەستی جھەکێ دا بیت نە ھەر ئێکی ھەبیت بیژت من ھندەک کچ و ژن یێن ڕزگار کرین بتنێ دا پارەکێ ب دەستخوەڤە بینیت و گۆت: نوکە ل دھۆکێ نڤیسینگەھەکا تایبەت بۆ ڕەڤاندیان یا ھاتیە ڤەکرن و پێدڤیە کەیسا ڕەڤاندیان ھەموو ب ڕێیا ڤێ نڤیسینگەھێ بیت و ئەوێن دیتر ڕێک پێ نەھێتە دان.
رێڤەبەرێ کاروبارێن ئێزدیان ل پارێزگەھا دھۆکێ ئاماژە بڤێ چەندێ ژی کر، ھەر کەسەکێ ئەم دگەل ب ئاخڤن دبیژت من دوسەد یان سێ سەد کچ و ژن یێن ژ دەستێن ڕێکخراوا تیرورستی یا داعش ڕزگار کرینە و گۆت: لێ ئەم دبیژین شەش ھزار وەلاتی یێن ھاتینە ڕەڤاندن ژلایێ تیرورستان ڤە ھەکە ئەڤ ژمارا بازرگان و کەساتیی و ڕێکخراوا دبێژن مە یێن ڕزگار کرین وەسا دیار دبیت چو کەس د دەستێ تیرورستان دا نەماینە، لێ ئەو بخوە ھێشتا گەلەک ڕەڤاندی یێن ماینە د دەستێن تیرورستانداو ئەو ژمارێن دھێنە گۆتن فلان بازرگانی یان ڕێکخراوێ ھندەک کەس یێن ڕزگارکرین نە دروستن.[1]