کۆمەڵگای تانجەرۆ کۆمەڵگایەکە، کەوتووەتە شارەدێی تانجەرۆ، شارۆچکەی سلێمانی.[1]
هاوسنوورە لەگەڵ گوندی قەرەتۆغان و هوانەدا.
خانووەکانی ئەم کۆمەڵگەیە خانووی سەربازانی حکومەتی ڕژێمی بەعس بوون، تائێستاش بەو شێوەیە ماونەتەوە.
خەڵکی ئەم کۆمەڵگەیە هەژار نشین و چینێکی نەخوێندەوارن و زیاتر بە کرێکاری و ئاژەڵداری سەرقاڵن.
ئەم کۆمەڵگایە لە ساڵی 1991 دوای ڕوخانی حکومەتی بەعس لەلایەن کوردنشینانەوە ئاوەدانکرایەوەو لەپێشدا بە (معسکر شهداء) بەناوبانگ بوو.
ساڵانی نەوەدەکان حزبی دیموکراتی ئێران بەشێکی زۆری ئەم خانووانەیان داگیرکردبوو، دواتر لەلایەن کۆسرەت ڕەسوڵ عەلی سەرۆکی حکومەتی ئەوکاتی هەرێمی کوردستانەوە ئاوارەکانی یەکێتی پارێزگای هەولێری تێدا نیشتەجێبوون، تائێستاش بەشێکی زۆریان ماون و نەگەڕاونەتەوە.
ژمارەی ماڵەکانی کۆمەڵگەی تانجرۆ تا ساڵی 2013، 300 ماڵ بوون بەڵام بەهۆی ڕێژەیەکی زۆر زیادەڕەووی لە زەوییەکاندا، لەئێستادا نزیکەی 500 ماڵی تێدا نیشتەجێیە.
ساڵی 2015 سەرۆکی شارەوانی سلێمانی لە کۆنگرەیەکی ڕۆژنامەوانیدا لەوەڵامی پرسیاری ڕۆژنامەنوسێکدا ڕایگەیاند: زۆرترین ڕێژەی زیادەڕەووی خانوو لە سنووری سلێمانی دەکەوێتە کۆمەڵگەی تانجەرۆوە.
لەم کۆمەڵگایەدا بنکەی تەندروستی و دایەنگاو باخچەو یاریگای تۆپێن و گۆڕەپان و مارکێتی گەورەو چێشتخانەو خواردنگەو بازاڕ و کافتریا بوونی نییە.