Heta niha #kovarên kurdî# yên helbest, çîrok, kovarên wêjeyî, psîkolojî, kovarê siyasî hebûn, niha yeka din, di wareke din de li wan zêde bû: Kovara wergerê, bi taybetî wergera helbestê bi navê LEWerger, bi kurteya xwe LEW derket.
LEW dê çar mehan carek weşana xwe bidomîne û wekî mijara taybet dê hemû nivîsên têde wergera helbestan û wergera tiştên bi helbestê re eleqedar hebin. Kovarê di 1’ê avrêla 2022’yan de biryar dabû ku dest bi xebata derxistinê bike û ji wê rojê de xebata xwe domand. Lijneya weşanê ya kovarê ji Miradê Miradan, Berfîn Huseynî û Yeqîn H. pêk tê.
Lijneyê li ser meseleya xwe wisa gotiye, “LEW êdî li hafa xemxur û xwendevanên kurdî berdest e û lew jî dilê me gelekî pê şanaz e! Helbet em ê nekevin babeta ka çi werger e, werger çi ye û yan ne çi ye; ji ber ku ev derav deraveke têr xweser e, ango jê re pisporiyeke din divê. Em vê babetê ji ehil, pispor û şarezayên vî karî bi xwe re dihêlin: Karê me bi xwe werger e û mebesta me kovareke kurdewar a wergera helbestê ye.”
Li aliyê din kovarê bal kişardiye ser xebatên wergerên ên Celadet Alî Bedirxan jî û wisa gotiye, “Di Hawarê de em pêrgî tên ku wekî gelek waran Mîr Celadet di ber werger/lêanînê de jî têra xwe ked daye, lebikiye. Em hewla xwe berdewama hewla wî ya bi nirx dibînin û lew em hejmara ewil a LEWê diyarî keda mîr dikin.”
Lijneyê di vê serdemê de bi dehan kesî re da û stand û di dawiyê de hejmara xwe ya 1’em amade kir û weşand. Hejmara rezber-kewçêr-mijdar-berfanbarê di bin edîtoriya Yeqîn h., Samî Hêzil, Ciwan Qado, Tengezarê Marînî, Azad Rêbiwar, Îbrahîm Xelîl û Tamara Sêwî hatiye amadekirin.
Di vê hejmara yekem de 41 wergêrî ked daye û li dor 60 tekst hatine belavkirin ku ev tekst ji 12 zimanên cuda hatine wergerandin. Wergerên têde bi kurmancî, soranî û kirmanckî ne. Kovara ku bi şiklek xweş hatiye amadekirin, bi helbestên ji zimanên cuda û mijarên cuda balê dikişîne. LEW ji niha de diyar e dê di warê xwe de valahiyeke dagire.
Ji bo têkilî:
Instagram: @lewerger_
Twitter: @lewerger_
Facebook: lew werger
Mail: lewwerger@gmail.com
[1]