داستانۊ شېخی سەنعانی
بەشۍ سېڼزەهەمە
دمای گېڵایۆ موریدەکاو شېخی سەنعانی پەی کابەی موبارەکی، دەسشان کەرد بە لاڵیایۆ و داواکەردەی خاوەنو کابەی هەکە هیدایەتو شېخی سەنعانی بڎۊ و چا نەوەشی عەشقیە ڕزگارش کەرۊن. جە ڕاو کەراماتیۆ خەلیفەکەو شېخی سەنعانی هاگاڎار کریا کە نزاو دوعێکېشا قبووڵۍ کریێنۍ، پەوکەی واتش بە موریدەکا با گنمێ ڕا پەی وڵاتو شامی پەی لاو شېخی سەنعانی.
هۊرېزە بشین، تا بە شاری ڕوم
بیاوین بە داڐ، شېخی ئاخر شووم
عابېد ئېد ئەژنی لەرزا، ستېزا
جە خاوی شیرین، دەر ساعەت خېزا
وات بە موریدان: بشین بە ڕاوە
ئینشاڵڵا کەرین، پەشت بە خوداوە
بە تەوفیقی هەقق بینای بانی سەر
جە کوورەی فرقان، ماوەرووش وە بەر
یاران واتشان: بەندە فەرمانیم
بەندەی کەمتەرین، شېخی سەنعانیم
جە کەعبەی شەریف، هیممەت خواهیی کەرد
چەنی موریدان، ڕوو بە ڕا، ئاوەرد
چەن شەوان و ڕۊ، کەردشان یوڵغار
تا یاوان وەپای قەڵاچەی کوففار
ساتێ جەو مەسکەن، نیشتەن بە زەمین
کەردشان ستایېش جەهان ئافەرین
خەرقەی ڕەهبانان کەردەنش نەوەر
مەگرەوۊ بە زار، جە عیشقی دولبەر
زننارش بەستەن، چەنی کەشیشان
ڕەنگ زەرد و زایېف، خاتر پەرېشان
شین بە نەزدی ئەو موریدان یەکسەر
سڵام دان وەنەش، مدران وەرانوەر
نە دەوری سەنعان گردین بەستن کۊ
خېزا، جە یاران، زایەڵەی بۍ شۊ
خەلیفە واتش: ئەی شېخی کامڵ
پەی چېش کەفتەنی نەی فیکری باتڵ
پەی چېش دینی هەقق وەر مەدەی جە دەست
مایېل بیت وە دین، تەرسای بت پەرەست
جە کەعبەی شەریف، جە چەشمەی زەمزەم
ئامای بەی وڵات، پەی دینی مریەم.[1]