نۋیستەی: ئاکۊ مارانی
11و ئەپڕیلو 2017
ئاۋەدانکەرڎەی ھۆرامانی
ئاۋەدانکەرڎەی ناوچەو ھۆرامانی بەتایبەت ھۆرامانو بەشۊ ئێراقی، کە ۋیس و نۊ (29) ساڵۍ دماو تەمامیاو جەنگو ئێران-ئێراقی و ۋیس و شش (26) ساڵۍ دماو دلېنەبەرڎەو داگیرکەریی دۆڵەتو ئێراقی، ھەڵای ۋیران مەنەن و ئا دەگا و یانۍ کە ئاۋەڎانۍ کریێنێ، بەس بە کۊششو خەڵکی وېش بېیەن و فەرمانداریی ھەرېمو کورڎستانی نەک ھەر دەگاکېش ئاۋەدانۍ نەکەرڎېنێ، بەڵکو ئا بۇجەیچە کە چە لایەنو ڕېکۋزیا کۊمەککەرە جەھانییەکاۋە پەی ئاۋەڎانکەرڎەو دەگاکا ھۆرامانو بەشۊ ئێراقی (ھەرېمی) تەرخان کریابۍ، وریا و دزیا و دیزەبەدەرخونە کەریا.
فرە بەداخۆ، ئاۋەڎانکەرڎېۋ کە لایەنو خەڵکیۆ یان پارتییە دەسەڵاتدارەکاۋە پەی بە پارتیی-کەرڎەی [بە حزبیی-کەرڎەی] خەڵکو ھۆرامانی کریان، خراپتەر چە ۋیران مەنەی، تەلارسازیی ھۆرامانیش دلېنەبەرڎەن و زېیاتەر درېژەدای بېیەن بە ڕامیاریی و نەخشەو دۆڵەتە داگیرکەرەکا و دەسەڵاتدارەکۍ ھەرېمو کورڎستانی ھەر پېسەو داگیرکەرا ھیچ گرنگیېۋشا بە ژیۋارو [ژینگە|محیط زیست] ھۆرامانی، بە تەلارسازیی گونجېیا چنی سرۇشتو ھۆرامانی، بە کەلەپۇرو خەڵکو ھۆرامانی نەڎان و مېیانو تەلارسازی ھۆرامانی، کە ناوچېۋی ۋەرۋاۋی و کویسانیی ھەن و تەلارسازیی عەرەبستانی سعودی، کە ناوچېۋی گەرمەسېری بیابانی ھەن، جېیاوازی نەمەنەن.
ھەر پاسە باخداریی ھۆرامانی کە نیشانەو دەسڕەنگینیی ھۆرامەکا ھەن، بېیەن بە قوربانی وېپەرسی و تەمەڵیی دەسەڵاتدارا و بە بۊنەو ڕاسازی پەی ئۆتومەبیلی، باخەکۍ ۋېرانۍ و بېبەرۍ کریێنۍ و ئا ڕێ کە دۆڵەتو ئێراقی پەی خزمەتو جەنگی و پەنەۋازیی سەربازیی درۊسۍ کەرڎېبېنۍ و ببېبېنۍ بە مەڵامەتو ۋېران بېیەو باخەکا ناوچەو ھۆرامانی، کەچی فەرمانداریی ھەرېمو کورڎستانی و ھۆرامییە دەسەڵاتدارەکۍ جېیاتی کۊرۆکەرڎەی ئا ڕا سەربازییا و ئەرەنیایۆ باخەکا، ڕاکېشا پانتەرۍ کەرڎۍ و ئاڼەی تەر باخۍ ھۆرامانیشا ۋېرانۍ کەرڎۍ و باخدارییشا دلېنەبەرڎ و مدرامانو باخدارەکاشا سەرکوتکەرڎ و ھامکات ھەرچی شەخەڵو سێرانکەرە شارییەکا بۍ، ئاۋردشا ھۆرامان، کە ئا جۊرە گەشتیارییە ھیچ کەڵک و قازانجېۋش پەی خەڵکو دەگاکا ھۆرامانی و بەتایبەت پەی باخدارەکا نەبۍ و نېیا، چۇنکە تۊزە و دۇکەڵو ئۆتومەبیلا ھەم بۊ بە مەڵامەتو بارگاۋی نەبېیەی ھۆرەکا و نەۋارای، ھەم بۊ بە مەڵامەتو نەپەروەریای ھەڕاڵەو درەختا و ھەم پیس بېیەی ژیۋاری و ئاۋۊ دەرەکا و چەمەکا و پا جۊرە سەرەنجام نەبېیەی بەرھەرمی و نەمەنەی کەڵک و قازانجو باخەکا پەی باخەۋانەکا ھۆرامانی.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (هەورامی) geschreven, klik op het pictogram
om het item te openen in de originele taal!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
Dit item is 1,109 keer bekeken
Schrijf uw commentaar over dit item!