باخچێوە بېگەرد
ئاماڎەکەرڎەی: ئەسعەد ڕەشید
بەشې یاڼزەهەمە
میرزا ئۆلقاڎر، باس جە خەلقو جڼی و زوڕیەتەکا مەکەرۊن. پېسە مزانمې (جن) مەخلووقێن جە مەخلووقەکاو خوڎای گۆرەی، کە ژیوایشان جیاوازەن. ماچۊ خوڎای خاوەن دەسەڵات تایفەو جناش دلې کوورې ئاییرینە خەلق کەردې، دلې وېشانە هامسەرگیریشان کەرد، فرې بیې، ئایینو ئیسلامیش پەنە خەڵات کەردې، پەی دوەسەڎ ساڵا پاڕەویشان کەرد، بەڵام دماتەر لاڕێ بیې، ئیتر خوڎای گۆرەی وایێ گەرمی پېسە سەبوونیش پەی کیاستې، داش وە دنیادا، تایەفەو جناش ۋستې دلې قەفەسی.
هەر جە ڕۊی ئەزەڵ تا ڕۊی عەرەسات
بەر سەفا، سەفای محەمەد سەڵەوات
جەو دما، جە نۊ جیهانداری فەرد
جانش، جە کوورەی ئاتەش خەلق کەرد
هەم جفتێ جە نار، کەرد وە دەمسازش
مایېل بی، وە عەیش، ناز و نیازش
باری حەملش بې، شش ماهش ویەرد
وەزعی حەملش بې، فرزەندێ ئاوەرد
باز هەم وەمەیلان، شاهەنشای جیهان
فەوزی فامشان، نییا، ئین جان
گشت جامەی مەعاش، زیندەگی پۊشان
گشت، جورعەی دەوڵەت، دنیا و دین پۊشان
وە ئەمری قادر، حەیی سوبحانی
زیاد بیی، ئەولاد، (جانی بە جانی)
چهار ڕوبعەی مەسکوون، دنیا سەرانسەر
بیی بە موڵکشان، بە ئەمری داوەر
تاکە خوڎاوەند، حەیی لا یەنام
یەک شەریعەتی ئایینی ئیسلام
ئېرسال کەرد پەیشان پەی ئادابی دین
سیدق و ئیخلاس و ئیتاعەو تەمکین
ئەو شەرییعەت، ڕاهنمان بۊ
جە ڕووی قیامەت، شەفاعەت خواهان بۊ
ئەمانەت واتەن، سیدق کەردشان
تا کە دووسەڎ ساڵ، وەڕا بەردشان
چەو دما، تایفەی (جانی ئیبن جانی)
دیسان، دەس کەرڎەن، وە ناحەزانی
بادێ چوون سەبوون، کوورەی ئاتەش بېز
دەلک، دانە ڕۊح، جان ئیبن جان ڕېز
داش وە دنیادا، وە یەک نیم نەفەس
تایفەی جانی، گرڎ کەرد، وە قەفەس.[1]