بە غەفڵەت تێپەڕی عومرم لە پەنجا
سپی بوو ڕیش و سەر یەکسەر لە ڕەنجا
ستارەی بەختی من جێما لە بورجا
ئیدارەی ماڵ و منداڵم نەگونجا
لە وەختی گەنجی و عومری شەبابم
لە حەربی (عەمر و زەید)دا بووم جەنابم
بەلاش و مفتە بوو نان و کەبابم
خەیاڵم وا ئەچوو هاوشانی شا بم
کە وەختێ جووتە فەقیانەی کەتانم
ئەخستە سەر مل و سەر باسک و شانم
لەلای خۆم وام ئەزانی بێچوە خانم
وەیا خۆ واریسی قەومی بابانم
ئەڕۆیشتم بەسەر ئەرزا بە عینوان
نەبوو شەخسێکی ساحێب ڕەحم و ویژدان
نیشانم دا تەریقی ژینی ئینسان
کە نانێ بێتە دەستم سەهل و ئاسان
ئەوا ئێستا کە دانیشتووم خەفەتبار
دڕا فەقیانەکەم قەومینە هاوار
کوڕ و کچ کۆمەڵێ لێم بوون بە سەربار
بەبێ ئیش و بەبێ سنعەت بەبێ کار
کە خۆم بەم نەوعە وا تووشی بەڵا بووم
بە داخ و دەردی دنیا موبتەلا بووم
زەلیلی مەوعیزەی شێخ و مەلا بووم
کە موحتاجی دەستی حاجی و قەلا بووم
کە وا بوو بۆ هەموو ئەولادەکانم
نەبەستم چاکە تا ماوم زبانم
ئەکەم بەحسی زەلیلیم و ژیانم
فکریان با نەچێ داد و فیغانم
ئەوانیش با نەبن وەک من گرفتار
نەکێشن ئاهی ساردی پڕ لە هاوار
تەمەڵ با دانەنیشن مات و خەمبار
نەبن موحتاجی دەستی یار و ئەغیار
دڵ و گوێ شل نەکەن بۆ وەعزی بێ جێ
هەتا مردن خجڵ بن با بە ڕەنجێ
بەبێ ڕەنج و ئارەق نابێ بڕەنجێ
لە فلسێ تا ڕیاڵێ تا بە گەنجێ
کە من زیندووم و موحتاجم بە خۆراک
لە هاوین و لە زستانا بە پۆشاک
چلۆن هەر دابنیشم مەست و بێباک
هەتا نەمرم لەبەرچی بچمە ژێر خاک [1]
#موفتی پێنجوێنی#
#دیوانی موفتی پێنجوێنی 2#