دوو هەزار ئەفسەری پلە باڵا لە #وەزارەتی پێشمەرگە# بەزۆرەملێ خانەشنین دەکرێن
خانەشنینکردنی ئارەزوومەندانە لە وەزارەتی پێشمەرگە ڕاگیرا و خانەنشینکردنی زۆرەملێی زیاتر لە دوو هەزار ئەفسەری پلە باڵا دەستپێدەکاتەوە؛ بوار، هۆکارەکانی ڕاگرتن و دەستپێکردنی خانەنشینی ئاشکرا دەکات.
بەپێی بەدواداچوونەکانی بوار، بەهۆی زۆری داواکاری پێشمەرگەکان بۆ خانەشنینکردنیان، وەزارەتی پێشمەرگە خانەشنینکردنی ئارەزوومەندانەی پێشمەرگەکانی بۆ ماوەیەکی نادیار ڕاگرت.
بەپێی بەدواداچوونەکانی بوار، هۆکاری ڕاگرتنی خانەنشینی ئارەزوومەندانە بۆ ئەوە دەگەڕێتەوە کە وەزارەتی پێشمەرگە ترسی هەیە ژمارەی پێشمەرگە بەشێوەیەکی بەرچاو کەم بێتەوە، بۆیە لەئێستادا ئەو پێشمەرگانە خانەشنین دەکرێن کە بە ڕاپۆرتی پزیشکی بیسمەلێنن کە ناتوانن دەوام بکەن.
راگرتنی خانەشنینی ئارەزوومەندانەی پێشمەرگەکان لەکاتێکدایە، لەسەر داخوازی هاوپەیمانان حکومەتی هەرێمی کوردستان بڕیاریداوە زیاتر لە دوو هەزار ئەفسەری پلە باڵا لە وەزارەتی پێشمەرگە بەشێوەی زۆرەملێ خانەشنین بکات.
خانەشنینکردنی زۆرەملێ ئەو ئەفسەرە پلەباڵایانەی دەگرێتەوە کە پلەیان هەیە بەڵام پایەیان نییە بۆ مومارەسەکردنیان و لە چەند ساڵی ڕابردوودا خرابوونە سەر بەڕێوەبەرایەتی (ئومرە)ی وەزارەتی پێشمەرگە و بەبێ دەوام مووچەیان پێدراوە. [1]