داستانۊ حەیدەری و سنۊبەرۍ
بەشۍ حەڤڎەهەمە
سنۊبەرە، بە (هومەیلا)ی کەنیزېش وات: بە پەلە فریایش یاوە، زامەکەیش شۊرە و پی دەسماڵو منە پەیش بەسە، دمایی نامونیشانش بارە پەیم. سنۊبەرە بە هەر قیمەتێ بۊ، گەرەکشەن حەیدەرش دەسەنە بەرنەشۊ.
وات بە هومەیلا: مودارا مەکەر
بشۊ، تا وەلای، شېری دلاوەر
پیاڎە بە، جە ئەسپ، چوون بەینەتداران
بشۊرە زامش وېنەی غەمخواران
ببەر چەنی وېت، دەستماڵی وېم
بە یەک تای شەدەم، ببینەش بە هەم
جفتێ شەدەی من، مرواری غەڵتان
ببەر چەنی وېت، پەرێ سایەبان
بنیە وە تەعجیل، بە زامش مەرهەم
بەقیە دەر وە زام، باوەرەش وە هەم
ئەو یەکتا شەدەم، سەیوان کەرە پېش
زامڎارەن ئافتاب، پەنا بڎۊ لېش
یە تەن، خۆر پەرێ، زامڎار خاس نېیەن
پەشیمانەنا، جە دەستم شېیەن
ئەر زیڼە مانۊ، پەی خەرجی دەواش
ئەر دووربای بمرۊ، دیڎەی هوونبەهاش
چەند تا، جە زوڵفان، مشک تاتارش
ببەرە پەرېش، پەی یادگارش
عوزری تەقسیرات، بېحەد فراوان
بوازە، بە شاڎ، بکەرەش ڕەوان
بواچە پەنەش: قەزات جە گیانم
هەرچی ئەو مېشۊ، بە ناو مەمانم
درېغ ببڕیا، دەستم بە شمشېر
تەرمم ببریا، بە شاری کشمېر
فیدات بام ئازیز، نادانیم کەردەن
مەبۊ جە تەقسیر، نادان ویەردەن
تاقیب کەر، پەرېم نامونیشانش
زوو باوەر پەرېم، جاه و مەکانش
تاکە نەکەردام، بە هوون غەڵتانش
گیانی شیرینم، باڵا گەردانش
هەرچی مەواچوو، ئەعلام کەر وەلام
ئەحواڵش باوەر، بەسەرگەردش بام.
[1]