پیری هەزار داد، پیری هەزار داد
پیری جە دەستت سەد جار هەزار داد
واوەیلا جە دەست جەور و جەفا و داد
تەخت جوانیم یەکسەر دای وەباد
کەم کەردەی بینای سۊمایی چەمان
قامەت وېنەی نەی خەم بی چوون کەمان
ئەو شېوەی ڕەفتار چوون کەبک کۊسار
ئیسە ناتەوان وېنەی کەفتەکار
ڕۊخسار پەر نوور شەفاف ئابدار
چرچ و قرچ کەردی چوون سیادەوار
کۊس شنوام ئېسە بېگۆشەن
عەقڵ و فام جەلام گرد فەرامۊشەن
نیشانەی پیرین، تەمام خاڵخاسان
چوون بادزەلان جەلام تەواسان
تاق جوانی تەمام نازاران
بکەروون کەچی لەیل و نەهاران
بەندە فەرمایان جە ئەمرێ فەرمان
بین وەقوربانم چوون قۊچ قوربان
بە پیری کەردەن و پیرم قەسەم
پېم ڕازی نین، هاوار وەجەسەم
جە ئۊبووهەت زۆرێ جوانی
شېر و پەڵەنگان مەکەردم فانی
هەر بیماری یە شەفایێ دییەن
سەبەب هەر بېیەن، جوانی نېیەن
پیری جە دەستت سەد جار هەزار داد
شەوق جوانیم یەکسەر دای وەباد
زۊر پەنجەی پا جە شەوان تار
مەگېڵام چوون بەرق ڕەعدێ نەووەهار
ئېسە چوون خەرچەنگ ڕووی ڕۊشنایی
یەک وەجەب ڕامەن جە کەم بینایی
قەتارەی دەندان ساف سەدەف بېز
کەل و کۊم کەردی وستەنت جە هېز
ئەودەم چوون خونچەی عەتر عەنبەرین
کەردی کڵاوەی سیا چوون قیرین
خەتەی زرېپۊش وەنەوشەی باخم
کافووری کەردی جە دەست داخم
داران کافووری مۊشک فام ورین
ئەویچ وارنای نە سەفحەی سەرین
تەخت بەخت زەوق تاق جوانی
پیری چېشت کەرد، کەردەنت فانی
چەند خەسرەو شاهان نەوجوان زەڕ
چەند مەﮪ جەمینان زوڵف بۊ عەنبەر
چەند لەیلێ وەشان، چەند شیرین شېوە
فەرهاد و مەجنوون پېشان بی لېوە
پیری داخ نیای و جوانیشان
تاڵ کەردی تەمام زیندەگانیشان
گشت داخ حەسرەت نەبەر نوېشتەن
پەی جوانیشان سیمای خەم ڕەشتەن
پیری جە دەستت سەد جار هەزار داد
تەخت جوانیم یەکسەر دای وەباد
هەور ئارەزووم گرمنۊ باران
نە بەرم سەندەن، نە نیشی خاران
هەرتا خەلاس بۊ «ئەحمەد» ئەسیری
جوانی نمەبۊ، هاوار جە پیری
پیری، هەرتا کە سەر نەنیۊ وەگڵ
داخێ جوانی و پیریش هانە دڵ
#ئەحمەد بەگی کۆماسی# [1]