ئازیز نەزانام، یە خەدېو خۊتەن
یەشەرت و یەشۆن یەتان و پۊتەن
یە دۊسی، یە مەیل، یەدڵداریتەن
یەقەوڵ، یە ئێقرار وەفاداریتەن
بە وەڵڵا بیللا سەوگەند وەردەتەن
یەعدهدوو پەیمان خەلاف کەردەتەن
من پاسەم زانا پەڕشەرت وشۆنی
نەزانام بێ مەیل بێ تان و پۊنی
جە بۊڵبۊڵ بېزار، خار نەوازەنی
یار چەنی ئەغیار، بێ مەجازەنی
ئەر مزانام ئینە وەفاتەن
ئینە سزای سەخت جەور و جەفاتەن
ئینە شەرتوو عەهد، بەین وبەقاتەن
ئینە خۊ ئەتوار ئاماو لواتەن
هەر بەو بێ شەرتی دەی کەردت قەسەم
. . . . . . . . . . . . . . . . . . . .
دڵ مەدام و ئێش مەودای نیشتە ڕدا
تێرێ مەوردم وەتۊی جگەردا
نەدڵ مەدام پێت پەرێ دڵداری
نە جگەر مەدام پەی زام کاری
نەوڵڵا و بیللا چەنیت مەوردم
نەعەهد و پەیمان بە جاماوردەم
تۊ وەدڵ مایل .... و ئێشەن
... مۊبەت دوستی تۊ چێشەن
.......................... نەونەمامی نۊ
...................... یەبێ شەرتی تۊ
یەخەندەی ڕەقیب یە شادی فێراق
یەسۊز دەروون ناڵەی ئێشتیاق
یە جۊش خاتر، یە ئەسرین چەم
یەبێ قەراری دڵەی پەڕ جە خەم
یەزەردی ڕۊخسار، یە خەم یەقامەت
یە نێش دووری یە ئێش زامەت
ئەی چ خاس کەردەن جەڕووی وەفاومەیل
ئەدای ئێنشای فەرد مەعدوومی دڵ کەیل
«بێ تۊ ئاریزم قەرارم چوونەن
تەوەن نیەنان، دڵ گۊشت و هوونەن
ئێنسافەن دووری زەخم بێ سامان
چێنە زیاتەر کافیەن ئامان»
غۆربەتەکەی چەم فرە یا کەم بۊ
تۊ خۊا با ساتۍ دڵ و بێ خەم بۊ
بەزمەکەی خەمان وەسڵت نە ویرەن
یا ناڵەی پەڕتەم جەلات دڵگیرەن
................. پەرێ ناڵەشەن
................... هەزار ساڵە شەن
...... گۊشەی چەم نێگا داری کەر
................. وەفاداری کەر
ئی ئێستێغنا و قین زیادەن پەی چێش
ڕەقیب ومەیلت دڵشادەن پەی چێش
ئەرماچی خەستەی مەینەتان بەردە
تکەی زۊخ جەرگ زامەتان وەردە
بادەی فەنای مەیل دووریش نۊش کەردەن
ئاریزۍ چۊن من فەرامۊش کەردەن
........ دووریت مەکێشوون .......
ئەسرین دیدەم نوور ئەفشان کەردەن
تیرەکەت مەرهەم شەفای دەردمە ن
دەردەکەت دەرمان ئاهی سەردمەن
دووریت ڕاحەتی، هېجرەت شادیمەن
فێراقت مایەی دڵ ئازادیمەن
وەسڵت خۊ سەرمەشق زێندگانیمەن
حوسنت شەرح شەوق کامەرانیمەن
بەڵام ئازیزم چینەی زیاتەر
مەتاو گرتەی ڕای دووری نەوەر
#ئەحمەد بەگی کۊماسی# [1]