ئەر بۊپڕووزۍ وە مەڵاڵەوە
بەیۊ وە لای تۊ جە شەماڵەوە
ئانە بۊپڕووز سفتەی جەرگمەن
مەعلووم بۊ مەعدووم وادەی مەرگمەن
ئەنیسی خەیاڵ دەردانی پڕ زام
مەرهەم جەستەکەی خەستەکەی ناکام
خەیلێن نە گێجاو بەحری مەهجووری
نە دەوری دوەی تەنوورەی دووری
پووشەکەی جەستەم وە پەنا کەفتەن
سامیعەم خەبەر یاران نەشنەفتەن
ئینشەلڵا، چەنی خۊشحاپی ی، شادی
نە شاخەی شۆخی گەردەن ئازادی
چەنی وەشبەختی دوو دەس نە گەردەن
عومرتان وە عەیش عوشرەت ویەردەن
نەک چوون من جە دەس بێ مەیلی دڵبەر
مەکێشوو هەر سات هەزار دەردی سەر
دایېم دڵ ڕەنجوور هیجرانی یارم
زنجیری جەفای زڵفی نیگارم
خسووس شەرارەی دووریی زۊر کەردەن
مەزرەعەی هەستیم وای سەبوون بەردەن
کەس بە وێنەی من پڕ مەینەت نەبۊ
گرفتاری دۊس بێ بەینەت نەبۊ
هیچ کەس موبتەلای دووری یار نەبۊ
چوون من سەرگەردان، بێ قەرار نەبۊ
کەس نەبۊ چوون من یاری بەد کاران
زامداری موژەی دیدە خوماران
جە هاژەی هووناو دەروونی پڕ دەرد
نە گەردشی چەرخ گەردوونی چەپگەرد
تا جە تۊ بڕیام، وە مەرگت قەسەم
ساتۍ ئاسایش نەدیەنم بە چەم
نەکەری خەیاڵ گلەیی کەردەن
نەواچی بادەی بێ شەرتیش وەردەن
ئەر زەلیلی دەست بێ شەرتان نەبوون
کەی مەبۊ مەیلت فەرامۊش کەروون
ئەو تووڵی قامەت قیامەت خێزەن
وەڵگی شاخی شەوق دەردینان ڕېزەن
تافی سافی ناز زۊر ئاوردەن لێش
خەمەن چوون قامەت خەمبارەکەی وېش
دیدەم مشکین زڵف، جەمین زەڕنیگار
دووریت شەو و ڕۊ لێم کەردەن وە ژار
ئەی شەو وە سەرگەرد جەوان مەردیت بام
یا زووم تەمام کەر، یا زوو بەر تەمام
ئېم شەو ئەسڵەن ویر بەیانیت نیەن
وێنەی هیجری من پایانت نیەن
مەشنەفتم کە شەو فیراق توول دارۆ
نە یەکجار وەی ڕەنگ غەزەب لێت وارۆ
یا فەڵەک چارەم سیا پەروەردەن
یا خەیر تۊ کلیل سوبحت گوم کەردەن
ڕۊ بە ڕۊ ماچوون بە ڕۊڕۊ و زاری
وە ڕۊی ئاخری ئاخر نەداری؟
سادەی ئاخر بەر، یا ئاخر باوەر
ئاخر گیان جە دەس دووریی خەلاس کەر
شەو و ڕۊ جە داخ زوڵف و دیمی تۊ
داوا و باسمەن چەنی شەو و ڕۊ
چوون شەو شێوەی زڵف موشکینت دارۆ
ڕۊ کە مۍ شوعاع جەمینت دارۆ
وە سەر گەردت بام ئاوات واستەی وێم
جەوانیچ تەسکین نمەیاوۆ پێم
ماجەرای ئاخر يوم الماتمەن
نەومێدی بڕیای قەتع حەیاتەمەن
ئەحمەد سەراپاش ئالوودەی دەردەن
یە ئاخر وشکاو سەر چەشمەی فەردەن
#ئەحمەد بەگی کۊماسی# [1]