ڕەحمان و ڕەحیم، ڕەحمان و ڕەحیم
بە نام «الله» ڕەحمان و ڕەحیم
الحمدلله العلی العظيم
«سبّوح» و «معطی» ، «فتّاح» و «عليم»
زات بێچوونت مونەززەﮪ و پاک
خاریجەن جە وەهم قیاس و ئیدراک
نە زادەی کەسی نە کەس زادەی تۆن
وەحیدەن زاتت، سیفاتت بێشۆن
جە سیفات و زات مەوجوودەن هەر شێ
ئەووەڵ و ئاخر تۆ نەدارۆ کێ
حەیی لایەمووت، زات بێ زەواڵ
«سميع عليم» ، فەرد بێ ئەمساڵ
جە دەرگای قودرەت قەزا کەرد قەدەر
جە سەدەف سونع بەراوەرد گەوهەر
جە عەکس زاتەن جیلوەی هەر سیفات
مەوجوودەن جە دوڕڕ قودرەت مومکینات
پەردەی سەماوات چەتر ئەتڵەس گوون
مدران موعەللەق بێ مێخ و ستوون
جیلوەی سیفاتەن شوعلەی ماﮪ و خۆر
گێتی بە شوعلەی هەردوو موسەخخەر
جە دەریای قودرەت قەترەش عەیان کەرد
سیفات وە کلید کەنز پەنهان کەرد
زەمین ساکین کەرد، سەماوات شەیدا
نەبات پەی وجوود وەحدەتەن گەوا
شەفەق نە زوڵمەت، گوڵ نە خار پەیدا
نەباتات نە خاک خارا هوەیدا
سەوت کەردەن بە قووت موسامەعەی گۆش
دڵ مەجمەعەی دەرک، عەقڵ و فیکر و هۆش
تەرجەمەی ئەفکار زەمیر زوبانەن
تەن ڕەسم ئالەت ڕۆح ڕەوانەن
ئەفرۆزندەی نار حەرارەت نوما
جاری کونندەی ئاو بێ سەروپا!
ڕەوان کەردەی باد نە هەوا و هاموون
زینەت ئەفزای نەجم هەفت پەردەی گەردوون
ئینس و فریشتە، جینن و شەیاتین
یاجووج و تیوور، وەحش سەرزەمین
یەکایەک ئەوساف حەدد سیفاتەن
موزیلل و موجیلل یوحیی ئەمواتەن
تەجەللای قودرەت جارییەن هەردەم:
عەدەم پەی وجوود، وجوود پەی عەدەم
زەڕڕێ جە پڕتە و قەهرت سەقەرەن
قەترێ جە دەریای ڕەحمەت کەوسەرەن
«فەقێ» ئینس و جان مەوسووف زاتەن
یەکسەر جە تەعریف سیفاتش ماتەن
سیفاتش بە تۆ چۆن مەبۆ تەمام
بەر موحەممەد بۆ سەلات و سەلام
#فەقێ قادری هەمەوەند# [1]