باخچێوە بېگەرد
نویستەی: میرزا ئۆلقاڎرو پاوەی
بەشۍ: هەشتا و یەرەمە
وەختێ حەلیمۍ و هامسەرەکەش (شووهەر) یاوێ بە شارو مەککەی، دمای تەواف کەردەی، گېڵێ شۊنەو زارۊڵێ ساوایرە پەی ئانەی شۊتش بدۊ پەنە، چوونکوم ئاڎە دمای وەرمەکەیش شۊتش زیاڎش کەردەبۍ، کە بەشو زارۊڵێ زیاتەری کەرېن، یاوێ بە عەبدولموتەلیبی (باباو محەمەد)ی، دمای وەشی و تشی، هەواڵش زانا کە ئا ژەنۍ ئانېنە کە خوڎای کیاستېنە پەی خزمەتو محەمەڎی.
تا، یاوان، بە شار، مەککەی موعەززەم
کەردشا، تەواف، بەیتوڵڵا حەرەم
خېڵی بەنی سەعد سەبقەت کەردشان
فەرزەندی ئەشراف، تەمام بەردشان
حەلیمە، هەرچن، گېڵان، بە ماڵان
جە عەمر و جە زەید، پەرسا ئەحواڵشان
یەک تیفڵ نەبی، پەی ئەوقاتی ئەو
جە قەومی قوڕەیش، پەی ئەوزاعی ئەو
پەشیمانی وەرد، ئەو جە ئامای وېش
واتش: یە تەقسیر، ئەهل و قەوم و خوېش
هەر کەسێ بەردش ساحیب ئیقباڵێ
نەداشان، بە من، هیچ کەس مناڵێ
جە ناگا، شەخسێ، بوزورگی ئەعزەم
ئاما، جە ناگا، (حەلیم) دی بە چەم
فەرما، جە ئېوە، ژەنێ شیردار بۊ
ئایا داخۊ بۊ، خزمەتگوزار بۊ
حەلیمە، واتش: ئەی شەخسە کۍ بۊ
وەیتەور، نیشانەی، بوزورگی پېش بۊ
واتشان: عەبدولموتەلیب، ئېدەن
سەرداری قوڕەیش، یاگەی ئومېدەن
حەلیمە، لوا، سەلامێ کەردش
ڕەسمی تەحییەت، وەجا ئاوەردش
عەرزش کەرد: بەل، من ساحیب شیرم
دایېم ڕەززاعەن، نەقش زەمیرم
پەرسا، جە کېنی، نامی، تۊ کامەن؟
واتش: بەنی سەعد، حەلیمە ناممەن
عەبدولموتەلیب خەندە، کەرد دەرحاڵ
وات: شوکرم بە زات، فەردی بۍ زەواڵ
چوون سەعد و حەلیم، نیکەن نامشان
سیفاتی خاسەن، جە مەقامشان.[1]