باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و پەنجەمە
دمای ئانەی عەبدولموتەلیب، محەمەدش ئەسپارا بە ئەبوتالیبی کوڕیش (مامۊ محەمەد)ی، پەی دمایین جاری، ڕوەش کەرڎە محەمەڎی و ماچۊ: ئەی نووری دیڎەم، کوڕەزای شیرینم، من خەریکەن ئەچی دنیای فانینە مەنزڵ مەفاڕوە پەی دنیای باقی.، ئەپی تەرزە:
دڵوەش بی، خەیلێ، خەندان بی کەمکەم
تا، ڕووی خیتاب کەرد، وە خواجەی عالەم
واتش: ئەی فرزەند، نووری دیڎەکەم
ئیبن عەبدوڵڵا، بەر گوزیدەکەم
من خۊ، وە سۊز، فیراقی تاسەت
جە هیجرانی بۊی، عەتری هەناسەت
وە غوسسەی تۊوە، جەی دنیای فانی
مەشۊم، وە مەنزڵ، جای جاویدانی
بەعد فەوقی من، وە دڵنەوازیی
چەنی کام، عەمۊت، مۊبەت، مەسازیی
تاکە، بە لای ئەو وەسیەت پەی کەروون
ڕەزامەڼیی تۊ، وە جا، باوەروون
وات: فەڵەک مەڵهەم، وە زامم شەندەن
سەکەراتی مەوت، تەڵخنی جان کەندەن
ئاسان بی جە لام، بادەی مەوت وەردەن
هیچ باکم نییەن، هەنی، جە مەردەن
بۊسا، گۊنای پاک، گوڵڕەنگی حەزرەت
وە غونچەی دەهان، قەشەنگی حەزرەت
بۊ نیا، وە بۊی، ئەو سەوڵی ساوا
ئەوەند وەسیەت کەرد، هەر تاکە، تاوا
ڕەختی زیندەگیی، وەجای ئەبەد بەرد
گیان تەحوېڵی دەس، قەبزی قابز، کەرد
ئەو شیی، وەعەدەم، حەزرەت جیا مەند
بەو تەور، ئەو، جە لای ئەبوتالیب مەند
چوون ئەبوتالیب، جە ڕیعایەتش
هیچ نەبی غافڵ، جە حیمایەتش
هەرتاکە قەریب، زەمانەی هیجرەت
جە مەککە بەرشیی، تەشریفی حەزرەت
هەر ئەو ڕۊ، چەنی حەزرەت، شەرتش کەرد
شەرت و وەفای وېش، تەمام وەسەر بەرد.[1]