#میرزای لوڕستانی#
بۊ تا بەرگەردیم سۇدێ پېت نېیەن
هایم پەی مەقسەد بېجا کۍ شېیەن
دۇ نەفەر سوار چېش مەیۊ جە دەست
مەره و پەی ئی کار ماوەری شکەست
ئاما بەجواب ئەمیری ئەنام
واتش بەنگینەی ساحېب عەقڵ و فام
غەیرەتت ئینەن جە دەھری دونیا
بەی تەور مەواچی حەرفانی بېجا
قەسەم بە داوەر دارای جەھاندار
بە خەمم و بە پېچ ئەبرۇانی یار
مەر وەقتێ گېڵۇن ئە من جەی مەکان
تەنم بېسەر بۊ نەماندە بۊم گېیان
ئەر تۊش وە لوان زەرۇرەن کارت
ھۊرگېل ئەو دما خودا بۊ یارت
بەنگین چۇن شنەفت گرەوا بە زار
ڕېزا بە چەمدا ئەسرینان ھەزار
واتش ئەی ئەمیر ڕۊحم بۊ فەدات
ھەر جا مەیلی تۊن سەرم ھا نەڕات
ھەر تا جەسەدم نە ڕۇی بەساتەن
سەرم خاکی سۊم جەھان پەیماتەن
ئېستدعام ئینەن جە دەرگای داوەر
ببەخشی گونای کەمینەی کەمتەر
سواربین وە ئەسپ عەنان سۊست کەردن
چەندێ بەحر و بەڕ بېدۍ تەیکەردن
ئێوارە وەقتێ یاوان وە جایێ
وە چەشمەی شیرین سەبزە گیایێ
گوشنەگی لێشان تەمام دا ئەسەر
گېڵان پەی شکار نە ئەو دەشت و دەر
ناگاﮪ ئاھۇیێ ئاما نە گوزەر
ئەمیر جەولان کەرد پەی ئاھۇی دۊڵبەر
حەربێ داوەنەش خەڵتان بی نە خاک
سەرش جېیا کەرد بە ئەمر بېباک
ئاوەردن دەردەم کەردن وە کەباب
واردشان کەباب بەبۍ نان و ئاب
تا سپێدەدەم گېرتشان ئارام
سەحەر زۇ وە ئەمر بەنای لایەنام
سواربین دەردەم ڕاناشان ستۇر
شەب تا ڕۊ مەشین ھەر دۇ بەی دەستۇر
مەنزڵ وە مەنزڵ قەتعی مەراحل
ئەسپش مەڕانا ئەو شاهی عادڵ
مەڕانان وە تاب مدران بە زەرۇر
ئەمیر دیش وە چەم جوفتارێ جە دۇر
سدای ھۆ بە ھۆی بەربەرش مەیۊ
ئاوازەی دەنگش مەشۊ کۊﮪ بە کۊ
ئەمیر وات بەنگین وادەی سەڵاتەن
نەمەز ئانە جوفت کامین وەڵاتەن
بشۊ بزانە ئەحواڵ و خەبەر
باوەرە پەرېم خەبەر سەرانسەر
جەولان دا وە ئەسپ بەنگین بېقەرار
تا یاوا وە لای ئەو مەردی جوفتار
سڵام کەرد وەنەش عەلەیک دا جەواب
ماندە نەبیش کەرد پەی خەیر و سەواب
پورسا ئەی فەللاح دەوری جەھانی
کەنەندەی مەغار غاری نەھانی
ئانە جوفتی کېن بواچە خەبەر
پەی کۍ مەکاڵی تۊ ئی دەشت و دەر
[1]