وەلی دېوانە
دڵ وە داخەوە، دڵ وە داخەوە
ئېم شەو خەریک بۍ دڵ وە داخەوە
جە داخ ئەو (شەم) شەوچراخەوە
تا ئاما بایێ جە ئېڵاخەوە
بادێ چۇن نەسیم ڕەوزەی ڕەزوانی
قوەت بەخشی ڕۊح سەد ساڵی فانی
نەسیمی نەفەس (مەسیح)ئاسا بۍ
تەسکین بەخشی زام دڵ شناسا بۍ
هەم شارەزای ڕای شای شەم جەمین بۍ
دۊسی پەروانان خاتر خەمین بۍ
شەمیمێ جە عەتر زوڵف شەم ئەو شەو
دانە ڕۇی دەماخ پەروانەی بېخەو
پەرسام ئەی نەسیم سوب خېزی سارا
دەماخ جە بۊی عەتر زوڵف (شەم) دارا
دەوەندەی تېژباڵ سارا سەیرانی
ڕاهنمای ڕەهبەر ڕاگەی حەیرانی
یە چۆنت زانا من ئېم شەو مات بیم
(پەروانە)ی پەشېو حەبس زوڵمات بیم
کۍ شەمیم عەتر (شەم) نمانا پېت؟
ئەی بۊی ئاوەردی نەسیم کۍ دا پېت؟
وات: ئەی پەروانەی پەڕ سوختەی مەلال
تەن خەستەی ئەییام خوڕڕەمی ویساڵ
منیچ وېنەی تۊ مەعتۇفی (شەم) بیم
جە بۊی عەتر شەم دەرۇن پڕ غەم بیم
[1]