سەرچەمەو واچۍ هۆرامانی
ئەوەنویستەی و دەسکاریکەردەی: ئەسعەد ڕەشید
بەشۍ یەکەمە

واچەکۍ ، چکۊوە ئامێنە و سەرچەمەش چېشەن، چن کەس و نویسەرێ، ڕایۍ جیاوازېشان هەنۍ.
چڼین نویسەرۍ و پەیجوورکارۍ، لەیەکۆدایۆشان پەی واچەکۍ کەردەن، کە ئەنجامگیرییەکەشان شایانو ئانەی نییەن،کە وانەری ئەنەیاوا، دەسگېرۊ سینەوە پەیشان.
چن کەسێشان، پاسەش پەی لوێنۍ، کە واچۍ هۆرامانی جە واچۍ(ڕمان_رمان)ی عەرەبیۆ ئامێنە.
بەعزێتەر، پاسە یاوانە، کە واچۍ(هۆرامانی)، جە واچۍ(ئاورامان)ی ئامێنە، کە بە ماناو(لەم هاڵی) یان(برسی) سۆرانی مێ، سەرچەمەو ویرلەکېشان چانەیۆ ئامێنە کە ناوچەو هۆرامانی سەمەر و بەر و بوومش کەمەنو خەڵکەکەش کەم دەسو ئاتاجەن.
چن کەسێتەر، بە ویرێوە ساڎە و پووچەڵ، لوێنۍ شۊنیشەرەو ئەنجامگیریێ بېماناشان ئاردەن، ئەپېسە:
ناوچەو هۆرامانی، چونکم سەختەن، خەڵکەکەش میانو چن کەشێنە مەژیوان، دوور جە ناوچەکاو تەری، ئینێ گۊشەگیرینە، پەوکەی واچەکۍ بە ماناو(هۊرئامای) مێ، یانی جە خەڵکی ڕەمێنۍ و دوورۍ کەوتېنێ.
بەعزێتەر ماچان: خەڵکەکەش ئایېر پەرەس بېیەن، پەوکەی نامۍ(ئاورمان)ی نریان.
چن پەیجوورکارۍ تەرۍ، ماچان: وەختێ ئەسکەڼەر هۊرامانی مەگېرۊن، مەکەرۊش بە زیڼانێ فرە گەورە، ئیتر پېسەنە خەڵکەکەش هۊرئامێباو دوورۍ کۆتېباوە جە خەڵکی تەری، پەوکەی نامشا نیان(هۆرئامان). ئېمە نیەنمۍ چەنی ئا پەیلوا وەڵینا، چونکم ناوچێوە گەورەی پېسە هۆرامانی نمەکریۊ بە زیڼان، گەر زیڼان ئەپاسە گەورە و فراوان بۊن، گرڎکەس حەزش چەنەکەرۊن.
ئینە چیلاوە، چەولایچۆ هەرگیز نامۍ (ناوچێ، دەگێ، دەرە، دەشتایی، زەمین)ی پا جۊرە نمەنریان، کە نزمی و جۊرێ جە کویلایەتیش پۆوەن.
نامۍ یاگۍ، بە نامۍ (پاڵەوان، زانا، دانا، کەسایەتیێ ئایېنی، ئابووری، ڕامیاری) نریان.
پەنڎێ باوە دلۍ هۆرامییەکانە باوەنە(ماچی زیڼانو ئەسکەڼەریا)، سەرچەمەو پەندەکۍ چانەیۆ ئامێنە هەکە(ئەسکەڼەر نەتاوانش هۆرامانی گېرۊن، پەوکەی ویرش جە ڕێوەتەرۍ کەردېنۆ پەی زەلیلکەردەی هۆرامییەکا)، جە بەرو هۆرامانیۆ زیڼانێ گەورەش وەشکەردەن، سەرو مەرزو مېیانو(عېراق_تورکیا) بە نامۍ(ئەورامن)، هەر هۆرامیێ بەرو هۆرامانیۆ دەسگیر کریێ، ڕەوانەو زیڼانو ئەسکەنەریش کەرېنۍ جە(ئەورامن)، هەتا مەردەی چەنەش مەنېوە.
نە بەگی مامون، نە تەیمووری لەنگ
هیچ کەس هۆرامان، نەگېرتەن بە جەنگ
غەیرەز خان ئەحمەد، بەگلەری خانان
ئاڎییچ بە حیلە، گرتەن هۆرامان.[1]