باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و وېس و یەرەمە
هەرچن خەدیجە، داواکارېش فرې بېنې، بەڵام ئاڎە دڵش نەڎا بە کەسی، تەنیا محەمەڎی نەبۊ، پەوکەی هامسەرگیریەکەشان بە داواکەرڎەی دەسش پەنەکەرد، بە وەشحاڵیۆ کارو خەیرېشان یاوا بە وایە، شاڎی و تەرەب دەسش پەنەکەرد. واتشان: پیر و غەڕەبان، یۊشا، پەروانە، یۊشا شوعلەی شەم، پیر و غەڕە بان، هەردووشان، بە هەم.
قەراری ساعەت، مەسعوودی ئەو ڕۊ
پەرێ بەستەی عەقد، شای فریشتە خۊ
چوون بابۊش، زووتەر، فەوتش کەرڎەبې
عەسمەت، پەناه پەشتی پەردە بې
یەک عەمۊی داشت، یەک عەمۊ زادە
هەردوو عولەمای ئەو وەقت و وادە
عەمروی بن ئەسەد، نامی عەمۊش بې
جانشین جای، موڵکی بابۊش بې
عەم عەمۊ زادەش، (وەرەقەی بن نەوفەل)
شېری مەیدان گیر، سەرداری سەر تەل
هەردوو تەڵەب کەرد، پەی تەزویجی وېش
بە قانوونی قەوم، بوزورگانی پېش
جەودما، حەزرەت، شای ئەعلا سیفات
خەتمولمورسەلین، خواجەی کائینات
ئەبوتالیبش، حاڵی کەرد جە کار
هەم ئەعمامی وېش گرد، کەرد خەبەردار
پەرێ کاری خەیر، مشوورەت کەرڎەن
تەشریف وە مەنزڵ، خەدیجە بەردەن
یەک نەفەر، عالەم، جە عیلمی دارا
قازی ئەو ئەییام، قەومی نەسارا
ئەو هەم وە مەجلیس کەردشان ئەختار
چەنی چن بوزرگ، دارای ڕوزگار
تا، ئەبوتالیب، خوتبەیێ، وانا
واتش: خوداوەند، عەلیمەن دانا
بېیەن شەو و ڕوژ، فەسڵ و ماهو ساڵ
حەمد وسەنا، پەی زاتی بې زەواڵ
ئېمەیش، وە ئەولاد، ئیراهیم سروشت
هەرتا، وە ئادەم، یەک یەک پشت بە پشت
فەزڵمان جە سەر مەخلووق گرد بېیەن
ئینە، مەعلوومەن، خیلافش نېیەن
کەعبەش، وە ئەولاد، مەناف سوپەردەن
زەمزەم، وە هاشم، ئەرزانی کەرڎەن
عەبدولموتەلیب، مەعلوومەن، لېتان
یەکسەر، گرد دیتان، وە دیڎەی وېتان
بەندە، خۊ ئەعیان، قەومم مەزانان
دایېم، وە ڕەئیس، حوکم، مەوانان
ئاخر محەمەد، برادەر زادەم
شای، زیبا، تەڵعەت خودا پې دادەم
بەرگوزیدەی زات، دانای داوەرەن
جە مەلایەکان، شەرەفناک تەرەن
مەکېشاش چەنی قوڕەیش بەرابەر
ئېڎ زیاڎتەرەن، وە دانای داوەر
خەدیجەی خویلد، تەڵەب کارشەن
بە دیڎە، بە گېیان، خریدارشەن
ویس شوتر، مەهر، حەقق سەداقش
تا تەبدیل، نەبۊ، بەزمی مەزاقش
وەرەقەی بن نەوفەل، خوتبەی وېش وانا
واتش: خوداوەند، حەییەن تەوانا
بەعد حەمدی زات، پادشای باریی
وە دینی حەنیف، عەقدش کەرد جاریی
عەمروی بن ئەسەد، وات، بە حەڵاڵی
هەم، بە هامجفتی بە خۊش ئیقباڵی
خەدیجەی خویلد، بە ئەمری ئەڵڵا
دام، بە محەمەد، ئیبن عەبدوڵڵا
یۊشا، پەروانە، یۊشا شوعلەی شەم
پیر و غەڕە بان، هەردووشان، بە هەم
ساچوون خەدیجە خوشحاڵ بی بە دڵ
مورادش جە لای خودا، بیی حاسڵ
فەرما کەنیزان، تا داشان نە دەف
سروود واناشان، یەکسەر، بې تەخەف
بەڵ، هەر ئەو ڕۊ، زەهرەی پاک ئەندېش
چەنی موشتەری، خورشید سیای وېش
نە خەڵوەتخانەی یاتاخی دەیجوور
مەوسووڵ بین، تا وەقت سفیدی کافوور.[1]