باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و وېس و هەشتەمە
محەمەڎ ئەچا کاتەنە فرە خەمباربې، هەم تەرسیش نېشتېبې وەنە، چوونکوم بارێ ئەچامنە، ئاسان نییەن، دنیاو غەیبینە، هەڵای یەقین نییەن. پەوکەی محەمەڎ مەگېڵاوە پەی یانەی، پەی لاو خەدیجەی هامسەرېش، سەرئاماکەو وېش پەیش گېڵناوە، خەدیجەی دڵداوە، ماچۊ: من هومېڎم هەن خوڎای بانیسەر عیزەتش پەنە بەخشابی.
نیدایێ ئاما، وات: یا محەمەد
حەبیبی حەزرەت، ئەزەل و ئەبەد
ئانە کۊ مەشیی، خەیاڵت چېشەن
خاترت، جە کې، دڵ، وە ئەندېشەن
تا حەزرەت، نەزەر، وە ئاسمان کەرد
دیش کە جوبرەئیل بە شېوەی یەک مەرد
مدران، موعەوەق، ها وە فەوقەوە
تەن، وە جەلای نوور، شاڎیی و زەوقەوە
وات: یا محەمەد، خۊ من دەلیلم
تۊ، ڕەسوولەڵڵا، من جوبرەئیلم
ئەندېشەت نەبۊ، خەوف بەرکەر نە دڵ
مورادت جە لای حەقق بییەن، حاسڵ
حەزرەت، جە مەعنای گفتوگۊی بېگەرد
جە خەیاڵی وېش، پەشیمانی وەرد
وە هەر تەرەفدا، ئیرادی ڕاش بې
فەوری جوبرەئیل جە نەزەرگاش بې
بەعدەز وقووعی قەزییەی عەزیم
بە چەند خەیاڵات، بې خەوف و بې بیم
هەم ڕۊ، وە مەککە تەشریف ئاوەردش
تەشریف وە مەنزڵ، خەدیجە بەردش
خەدیجە عەرز کەرد، یا ئەبولقاسم
جە دووریت، بڕیان، خاو وخوراکم
قاسید کیانام، دیارت نەبې
دووربا، دوور جە تۊ، ئاسارت نەبې
تەشریفی خەیرت، وە کۊ بەردەبې
بە خوڎا، ئیمانم، پەی تۊ هەردە بې
فەرما من خەوفم خەیلێ ها نە دڵ
فیشتەر دەغدەغەم، پەی بییەن حاسڵ
پەی چېش، ئەو شەخسە، نەوا کاهن بۊ
وە زاهیر، تڵا، وە بەتن ئاهین بۊ
خەدیجە عەرز کەرد، وات: مەعازەڵڵا
ئەی نووری عەینەن، ئیبن عەبدوڵڵا
خوڎای زیلجەلال بېهەمتا فەردەن
فەزڵی وېش بەتۊ، ئەرزانی کەردەن
من ئومېڎم هەن، ساحیب عیزەتبای
هەنی پېخامبەر، موڵکی میللەت بای.[1]