#وەلی دېوانە#
قیبلەم ڕېش نەبۊ، قیبلەم ڕېش نەبۊ
ئەر دڵ وە مەودای عەشقت ڕېش نەبۊ
ئەر تەن بەڵابار مەینەتکېش نەبۊ
ئەر دیدەم خاری دۇریت تېش نەبۊ
ئەو دڵ سېیاسەنگ ئەو دیدە تار بۊ
ئەو تەن کۊنە کونج ماوای مەزار بۊ
سەرێ سەراسەر نە سەودات نەبۊ
گشت دەمێ نە گەرد خاکی ڕات نەبۊ
ئەو سەر بۍسامان نە تەن جېیا بۊ
خامۊش غەڵتانی خاکی سېیا بۊ
پایێ نەکەرۊ ئامۊشۊ وە لات
دەسێ نەکېشۊ شەو و ڕۊ جەفات
ئەو پا گەستەی مار ئەفعی حەفت سەر بۊ
ئەو دەستە مەجروح زامی خەتەر بۊ
زوانێ نە زکر سەنای تۊ نەبۊ
شەو و ڕۊ نە فېکر دۊعای تۊ نەبۊ
ئەو زوان بۍ نوتق هەر وە پڵاس بۊ
ئامین بڕیدەی تېخی ئەڵماس بۊ
من جە دۇری تۊ شای شەم جەمینان
هەر کاتێ زانای لاشەم مەوینان
[1]