هەمان حیکایەت: شەعبەکە حیساری لەسەرە، تەواو برسیی بووە و سەرما و گەرمای بووە، جیاوازی و چینایەتییەکی ئابووریی نا بەرانبەر و ناعەدالەتیییەکی زۆر هەیە، نا ئومێد بووە، ئیتر ئەگەڕێتەوە بۆ ئومێدێکی گەورە بە جیهانێکی باشتر و بۆ ئاییندارییەکی شەعبی. دەسەڵاتیش بۆ زیاتر خافڵاندن و تەخدیرکردنی شەعبەکە حەملەیەکی ئیمانی و کۆمەڵێک ئیجرائاتی شکڵی دەستپێئەکات، بۆ سەپاندنی دیمەنێکی ئایینی ڕووکەش بەسەر کۆمەڵگادا، ئەوەش بە لابردنی هەندێک شتی زۆر زەق، بە گرتنی هەندێک لەشفرۆش، و بە داخستنی هەندێکی شوێنی خواردنەوە و سەما. ئیتر هەموو ناعەدالەتیییەکی نا شەرعییش بەردوامە.
بەعس لە کۆتایی مێژووی خۆیدا لە ئێڕاق وای کرد: حەملەی ئیمانیی لە هەموو دام‌ و دەزگاکانی حیزب و حوکوومەتدا سەرپێ‌خست. لە کۆتاییەکانی دەسەڵاتی بەعسدا وای لێ هاتبوو هەندێک لە سزا ئیسلامیەکانیش کە لە یاسادا جێیان نابێتەوە لێرە و لەوێ جێبەجێ ئەکران، سزای توند و ترسناک (دوای کەوتنی ڕژێم ڤیدیۆکانمان بینی)، کە ئەو بارودۆخە ڕێ خۆشکردن بوو بۆ عەقڵیەت و مەنهەجی داعش و ئەو دڵڕەقی و وەحشیەتەی هەر لە سەرەتاوە لە کردەوە و پراکتیسەکانی داعشدا هەبوو، هەر بۆیە گەلێک لە دامەزرێنەران و ڕێکخەرانی داعش ئەفسەری باڵای بەعس و سوپای ئێڕاقی بوون.
ئێستاش ئەو مێژووە بە جۆرێکی تر دووبارە ئەبێتەوە: لە لوتکەی بێ ئومێدیی خەڵکدا، و لە سایەی درووستبوونی هەزار گوماندا، بە کۆمەڵێک قسە و دروشم و شتی ڕواڵەتی موجامەلەی ئایین و خەڵکی ئاییندار ئەکرێ و ختووکەی هەستی ئایینی خەڵک ئەدرێ، بۆ مەستکردنی جەماوەر و ڕازیکردنی هەست‌ و سۆزی ئایینییان، بۆ شاردنەوەی کەموکووڕی و کێشەکان و خەفەکردنی ناڕەزایی و گومانەکان. کار گەیشتووە بەوەی (میستەر بافڵ) (کە پێشتر لە کەمترین بێزاری و هەراسان‌ بووندا بیستمان چۆن کفری ئەکرد و جوێنی بە خودا ئەدا (والعیاذ بالله! خوا پەنامان بات!)؛ وا ئێستا بەپێی ناوەرۆکی لێدوانی نووسینگەکەی و ڕاپۆرتی میدیای (ڕووداو) هەڵمەتی جێبەجێکردنی یاسای ئایینی دەستپێکردووە، یان ڕاستتر ئەوەیە دیعایە ئەکات کە لەبەر ئایین و ئیسلام وا ئەکات، و ئینجا ئەهلی دینیش دەست خۆشیی لێ ئەکەن و شایەتیی دینداریی بۆ ئەدەن!
ئەوەیە ئیستیغلال کردنی دین بۆ سیاسەت و (بۆ بەرژەوەندیی حیزبی و بۆ هەڵمەتی دەنگ کۆکردنەوە و ئامادەکاری بۆ ڕۆژی دەنگدان)، نەک ئەوەی ئیسلامیەکان ئەیکەن کە ئیستیغلال کردنی سیاسەتە بۆ دین.
ئیسلامیەکانیش هەموو نیفاقێکیان پێ خۆشە، مادەم ماستاو و ڕووپامایی و دووڕوویی بێت بۆ ئیسلام. مادەم هەندێک دروشم و دیمەن و ڕواڵەتی ئیسلامی بدات بەسەر دەسەڵات و کۆمەڵگادا.
بەڵام لە کۆمەڵگای ئیسلامیی سەردەمانی خیلافەتیش هەر وا بووە: خەلیفە و سوڵتان و سەرمایەدار هەمیشە مەجلیسی ڕازاوە بووە بە ناز و نیعمەت و کەنیزەک و سەماکەر، و زوهد و دنیا نەویستییش بۆ خەڵکی نەدار و هەژار و کرێکار و کۆیلە بووە.
ئینجا ئەگەر ئەو شوێنانە کاری نا یاساییان تیا ئەکرێ؛ بۆچی تا ئێستە ڕێگە پێ دراو بوون؟
ئەگەر ڕێکاری یاساییە؛ بۆ لایەنی پەیوەندیدار جێبەجێی ناکات؟! #بافڵ تاڵەبانی# بۆ بووە بە حوکوومەت و وەزارەت و پارێزگار و قایمقام و شارەوانی و بەڕ و بەحر؟!
ئەگەر کاری نا یاساییان تیا ناکرێ؛ بە چ یاسایەک قەدەغە ئەکرێن؟ ئەو یاسایە بەس بۆ گەڕەکی سەرچنارە! یان شوێنی تریش ئەگرێتەوە؟! یانە تایبەتەکان ناگرێتەوە؟! یانی ئەگەر داپۆشراو بێ و بۆ ڕەش‌ و ڕووت نەبێ و تایبەت بێ بە چینی باڵا؛ ئاساییە؟!
ئەگەریش تەنیا لابردنی هەندێک یانە و کڵەبە کە لەناو ماڵەکانی گەڕەکی سەرچناردا کراونەتەوە و دانیشتووانی ئەو گەڕەکانە سکاڵایان بووە لە دەستیان (کە وا دیارە ئەمە حەقیقەتی باسەکەیە)؛ کەواتە تەنیا پێیان دووردەخەنەوە، و ئیتر ئەم ڕیکلامە گەورەیەی بۆ چییە؟ و بۆچی ئەیکەن بە منەت بەسەر خەڵکەوە و وا پێشانی ئەدەن لەبەر دڵی ئایین و ئاییندارانە؟!
ئینجا ئەگەر وەکوو دەڵێن بە بڕیاری قایمقام بووە؛ ئیتر ئەمری تۆی بۆ چییە؟ و سەرپەرشتی و سەرەتاتکەی تۆی لە ئۆتۆمبیلێکەوە بۆ چی بوو؟!
ئەگەر بەپێی هەواڵەکەی میدیای (ڕووداو) بێت: بڕیارەکەی سەرۆکی یەکێتی ئەوە بێت هەموو ئەو شوێنانەی لەگەڵ ئایین (ئیسلام) ناگونجێن دابخرێن، و هەرچی لەگەڵ ئایین نەگونجێت لاببرێت؛
دەی لەمەودوا بچووکترین لادان لە بیروباوەڕی ئیسلام و یاساکانی شەرع لە ڕاگەیاندنی ڕەسمیی یەکێتی ببینرێ؛ لە قاو ئەدرێ!
لەمەودوا یەک مەجلیسی خواردنەوەتان ئەبێتە هەواڵی بەپەلەی کاری ناشەرعیی یەکێتی!
لەمەودوا ئەبێ ئیدارەی گشتی و کۆمپانیاکانی زەکات بدەن. قابیلە هیچیان نەبێ زەکاتی لێ بکەوێ؟!
لەمەودوا ئەو مەسئوولەی نوێژ و ئەرکە ئایینیەکانی تر جێبەجێ نەکات؛ هەر دەسەڵاتەکەیشی شەرعی نییە!
لەمەودوا ئەبێ حیزبی یەکێتی مولتەزیم بێ بە حەڵاڵ و حەرامی ئیسلامەوە! تازە بووە بە قسەی خۆیەوە!
ئایین تەنیا لابردنی هەندێک باڕ و سەماخانە نییە. جێبەجێ‌کردنی ئایین و شەریعەتیش بەش‌ بەشکردن هەڵناگرێت أفتؤمنون ببعز الکتاب وتکفرون ببعز؟!
نایشکرێ ئەو شتانە و ئەو شوێنانە بۆ خەڵکەکە حەرام بن، و بۆ چینی بەرپرس و سەرمایەدار هەموو شتێک حەڵاڵ بێ!
ئەگەریش کێشمە کێشەکە وەکوو هەندێک دەڵێن لەگەڵ مەسئوولی بازرگانی ترە و دەستشکاندنەوەی نێوان خۆیانە، و ئەمانە دائەخەن، و دوایی لە شوێنی تر و بەپەنامەکی هی تر ئەکەنەوە؛ ئیتر بۆچی خۆڵ ئەکرێتە چاوی خەڵک و ئەڵێن لەبەر ئایینە؟! نازانن دوایی هەمووی کەشف ئەبێ؟! [1]
#سەروەر پێنجوێنی#