باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و سی و دوەمە
دمای گفتوگۊ میانو خەدیجەی و محەمەڎی، کە بە محەمەڎیش وات: حەتمەن ئانەی ئامان پەی لایت، ماموورو پەروەردگاریەن، پېخامش پەی تۊ ئاوەردەن، چوونکوم خەدیجە فرە بە عالی محەمەڎی ئەشناسې، کە خاوەنو سیفەتە باڵاکان، ئیتر پەی دڵنیایی، خەدیجە تەشریفش بەرد پەی لاو (وەرەق بن نوفل)ی، کە مامۊزاش بې و شارەزاییش جە دینە سەماویەکانە بې.
خەدیجەی کوبرا، سافی بې عەمەڵ
هانا بەرد وە لای (وەرەقە بن نەوفەڵ)
واتش: ئیبنی عەم، دڵ وە ئەندېشەن
جوبرەئیل چۊنەن، نیشانەش، چېشەن
وەرەقە دا، جواب، قددوسەن قددووس
فریشتەن دوورەن، جە سەدای ناقووس
ساتێ نەشناسان، خوڎا، بە دەلیل
فائېڎەش چېشەن زیکری جوبرەئیل
خەدیجەی کوبرا، وات: عەفاکەڵڵا
ساحیب کارمەن، ئیبنی عەبدوڵڵا
ماچۊ، جوبرەئیل، ئامان، وە لای من
وشاران، تەمام، سەر تا وە پای من
یانێ وەی حەرفە، تۊ باوەڕ داری
هەنی ئەو کازب، وە چەم مەداری
وەرەقە وات: بە دڵ، ئەر ڕوحەلئەمین
نازڵ، بۊ، وەی جا، نە ڕووی سەر زەمین
خەیرێ، عەزیمێ، ڕوو مەڎۊ، پەی عام
خوسووس، پەی مەککە، مەدینە، هەم شام
نامووسی ئەکبەر ، پەیکی جاهانەن
مابەین، جای خوڎا و ئەنبیاهانەن
پەی مووسا و عیسا، وەحی ئاوەردەن
مۊبەت، هەر چەنی، ئەنبیا، کەردەن
خەدیجە واتش: سیوای جوبرەئیل
مەرقووم هەن، جە ڕووی تەورات و ئینجیل
جەی زەمانەدا، وە بې دەردیسەر
یەتیم، فەقیر، بۊ وە پېغەمبەر
خوڎای زیلجەلال، ئەو غەنی کەرۊ
زەنی با فەخر و حیشمەت باوەرۊ
وەرەق وات بەڵې، حەقق دانا و نېکۊن
وەسفی ئەو ژەنە، گرد سیفاتی تۊن.[1]