باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و هەشتاهەمە
ئەبوجەهل و ئەهلو قوڕەیشی وازشان نارد، پەناشان بەردە ئەو لاو کەسایەتیێ تەری کە زاناو عاقڵ و فەسیحەن، داواشان وەنەکەرد بە زانیاریەکاش پېخامەکەو محەمەڎی بەدرۊبوزۊوە، دماتەریچ تەماعەی دنیاییەش بوزۊ وەردەم:
ئاخیزەن ئیختیار قورعەی بەدیعە
کەوت ئەو عەتبە ئیبنی ڕەبیعە
یەک بیی جە ئەهل عولەمای قوڕەیش
فەسیح تەر جە گرڎ فوسەحای قوڕەیش
ئاخېز کەرد نەجا وە بې چەند وچوون
بە هەزار تەزویر دەبدەبەی فنوون
چەو دەمدا حەزرەت شای خەیرولئەنام
تەشریف بەردەبې وەبەیتولحەرام
عوتبەی گومڕا بېچارەی عاقڵ
ڕەنگ سیای کوفر غەرەز و کینە دڵ
وە خەیاڵی فەن، سوخەن پەروازیی
واتش: محەمەد مدەروون بازی
شوعلەی خامۊشیی بې تاسیر جە کۊ
نووری ئافتاب جیهانگیر جە کۊ
غەرەزی عەتبە سەڎ خەیاڵ نە سەر
تا شیی وە خزمەت شای خەیرولبەشەر
وات: ئەی محەمەد خەیاڵت چېشەن
جە خەیاڵی تۊ عالەم دڵڕېشەن
تۊ ئەمری عەزیم گرتەنی جە دەس
مەیسەر نمەبۊ هەرکەس پەرێ کەس
ڕوئەسای قوڕەیش گرڎ ساحیب نەسەب
کەردی وە سەدژان تایفەی عەرەب
توخمی جودایی جە مابەین شانای
ئیلاهانی قەوم بە باتڵ وانای
مەشغووڵی دایېم بیداریی تا نەوم
بە تەکفیری جەدد بوزورگانی قەوم
ئابڕووی مەجلیس سەنادید بەردی
ئېمە یەکا یەک گرڎ تەنزیح کەردی
ئەر تۊ مەقسوودت وە سەلتەنەت بۊ
هەواو تەککەبور شان و عیززت بۊ
ئانە وە پەیمان وە میساق مەبۊ
وە جەمهووری جەم ئیتیفاق مەبۊ
ئەمری حکوومەت جوملەی خاس و عام
مسپارین وە تۊ سەراسەر تەمام
یاخۊ ئەر مەیلت سەفا و لەززەتەن
باعیسی غروور هەواو شەهوەتەن
هەر جەمیلەیێ وېت مەکەر پەسەند
ماوەرین پەرێت وە بې چوون و چەند.[1]