#بېسارانی#
شیرین بەینی نۊ، شیرین بەینی نۊ
تۊ چەنی بەڎان، بەستت بەینی نۊ
زوڵف ئەشەدی کڵاف، خاڵان عەنبەر بۊ
چۇن بېبەینەت پیت بېزیام جە تۊ
ئەو ڕۊ ئیبتیدای عەهد و پەیمان بۍ
پەیمانت بە عەهد لەیلای زەمان بۍ
بە لەفزی شیرین ئېقرارت مەکەرد
لافی بەین مەدای، سەوگەندت مەوەرد
منیچ بەو گوفتار خەیلێ بەردم ڕەنج
واتم مەر بە ڕەنج پەیدا ببۊ گەنج
ئاخر نە گەنج دیم، نە سەوگەند، مایە
ڕەقیب ناستانەت یاوا بە پایە
حاشا، جە ئەلتاف لوتفی خوڎاوەند
ڕەنجبەر بېبەش بی، ڕەقیب وایەمەند
[1]