باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و دواڼزەهەمە
عەدداسێ لواخزمەتو پېخامئاوەری، پارچە قوماشێ ئەنگۆرەش داپەنە، پەی ئانەی زامەکاش پسەڕۊ و بەسۊشان، بەڵام وەختێ ئەدەب و شەرم و نەرموونیانی حەزرەتیش وینا، سەرش سوڕمەن. حەزرەت فەرماواش:خەڵکو کۊگەینی؟ ماچۊ: نەینەوا، ئیتر زیاتەر ئاشنێ یوترینی بیۍ.
عەتبە و شیبە هەردوو نە باغ بین
خەیلێ خاتر شاڎ دڵوەش دەماغ بین
جە یەک مەوزووع مورتەفیع بی خەم
هەردوو بە دڵشاد نیشتەبین وە هەم
جە ئەهلی تایف نەزان کارشان
جە بۍئەدەبی کەچ ڕەفتارشان
نیسبەت بە حەزرەت یەکسەر گۊش دەردەن
موشاهیدەی حاڵ ئەو سەعات کەردەن
ڕەحمی قەرابەت ئاوەردەن نە دڵ
نامووسی مەردی کەردشان حاسڵ
یەک تەبەق ئەنگوور ئاڵام عەقیق خام
داشان بە عەوداس نەسرانی غوڵام
بەرۊش بە نەزەر کیمیایی ئەسەر
نیا نە خدمەت شای خەیرولبەشەر
حەزرەت وەر جە گرد بسم الله کەردش
دەسی موبارەک پەی ئەنگوور بەردش
عەدداس کەردش سەیر شەرمی شونی ئەو
دیا وە شېوەی هەمایونی ئەو
وات: ئەی کەلیمە پاکی موقەددەس
من جەی مەملەکەت نەشنەفتم جە کەس
حەزرەت فەرماوا: تۊ جە کام دیاریی
مەکانت جە کۊن، چە دینێ داریی
جوابدا کە من خەڵقی نەینەوام
غوڵامی مەردم، وېڵ و گەدام
مەخلووق ماوای نەینەوا زەمینم
غەریبو غەمبار نەسرانی دینم
حەزرەت فەرما تۊ عیزەت قەرینی
جە قەریەی یونس ئیبنی مەتینی
حەزرەت وات: چەنی ئەو برادەرم
ئەو پېغەممەرەن، منپېغەممەرم
عەدداس چوون شنەفت جەئینشای حەزرەت
پەیاپەی بۊسا خاک و پای حەزرەت
عەتبە و شیبە نیگاشان مەکەرد
واتشان: غوڵام بە فەساد ئاوەرد.[1]