باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چل و حۆتەمە
میرزا ئۆلقاڎر ئەچی بەشەنە، نامۍ ئا شش کەسەیە بەیان کەرۊن کە جە ئەهلو مەدینەی، جە سەرەتاو ئیسلامی ئیمانشان ئاوەرد بە محەمەدی و پېخامەکەیش.
ئیسمی پاکی ئەو سەعادەتمەندان
یەکیەک بەیان کەم چوون دەفتەر بەندان
ئەوەڵ جار(ئەسعەد) بەنی زەرارە
تەنها موبادیز سوپای هەزارە
عەوف بەنی حارس بەنی غەفران بۍ
سالیسەن (ڕافع) نەوەی عەجلان بۍ
چوارەم قوتەیبە ئیبنی عامر بۍ
پەنجەم عەقەبە ئیبنی جابر بۍ
ششەم هەم جابر عالی جەناب بۍ
ئیبنی عەبدوڵڵا ئیبنی ڕەباب بۍ
جە عەقیدەی پاک ئەو هەر شش نەفەر
یاوان وە خدمەت شای خەیرولبەشەر
خواجەی کائینات تا پەرسا لېشان
جە ئەسڵ و نەسەب جە ماوا و جېشان
عەرز کەردەن، ئېمە ئەهلی مەدینەین
قەبیلەی خەزرەج قەومی ڕۊشن زەین
حەزرەت فەرماوا ساتێ وە بۍ خەم.[1]