باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەفتا و دوەمە
سارا و بېیابان گرد خار و مارەن، حەزرەت جە پای شەریفش ناعلەکېش وەتۍ، پا نیۍ ملوو دڕەیەکارە، نەک سەحەر دژمەنەکۍ یاگە پێکاش بېزاوە، ساقی شەریفش پەڕبی جە هوون، ئەبوبەکر حەزرەتش گېرت قەڵادۊشکۍ، تاکو یاوناش وەردەموو بەرەو مەڕەو سەوری (غار سور) ، بە ئەمرەو حەزرەتی، ئەبوبەکر تەشریفش بەرد دلۍ مەڕەکۍ. ئەبوبەکر دیش دلۍ مەڕەکۍ ۋڵ ۋڵەن، عەباکېش وەتەو پارچە پارچېش کەردە، ۋڵەو مار و مارەکوڵەکاش پەنە گېرتە.
ڕای چوڵ و خەتەر سەختی ناهەموار
سەحرا گرد یەکسەر جە گەزندەی مار
حەزرەت نەعلەینش جە پا بەر ئاوەرد
پای موبارەکش تەمام بلوق کەرد
پەنجەی پاش نېیا وە سەرینی خار
تا سەحەر شونش هیچ نەبۊ دیار
ساقی شەریفش جە سەرتاکو بە وار
گوڵگوڵ بو بە هوون نېشی مەودای خار
غەرەز هەر ئەوەند زەحمەت پېش یاوا
خەستە بیی جە تەن شای بەتحا ماوا
سیدیق بەو دڵەی پەڕ و جۊشەوە
دەرسات حەزرەتش گرت وە دۊشەوە
ڕاهان تەی کەردەن نە ڕووی عەرسەی دەور
هەتا یاوناش دەربی غاری سەور
بە ئەمری حەزرەت شای بوراق سوار
سیدیقی ئەکبەر تەشریف بەرد وە غار
دیش سوراخ سوراخ ئەندەروونی غار
گرد جای عەقرەبەن لانەی موور و مار
سیدیقی ئەکبەر کېشا ئاهی سەرد
قەبای تازەی وېش پارە پارە کەرد
هەر پارێ نېیا وە سوراخێوە
هەر سوراخ پەرێش بیی بە داخێوە
تا حەزرەت تەشریف بەرد وە ئەندەروون
حەیران مەند جە کار گەردوونای گەردوون.[1]