باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەفتا و یەرەمە
وەختێ سەباحی ساڵحان ئاما، خورشید کۆت، بە نوورش غارو سەوری ڕۊشنە بییۆ، حەزرەت سەرەش نېیا سەرو ڕانو ئەبوبەکریۆ، وەرمش کەوت پۊرە، ئەبوبەکر جە دیوارو مەڕەکېنە ۋڵێ (سوراخ) ش وەرچەم کەوتە، پېسەبۍ یاگۍ ئەژدیهای حۆت سەری، پاژنەو پایش نېیا سەرو ۋڵەکېوە، جە ناگاە مارێ گەست، بە خاترەو ئانەی حەزرەت هایییش نەبۊوە، نەژڵېویا، بەڵام جە ئازارەو گەزتەی، قەترێ هەڵسی ڕېزا وە ڕووی حەزرەت، بېدار بی.
سەحەر وە تەوفیق دەهەندەی داوەر
خورشید جە مەشریق سەر کېشا وە بەر
ڕۊشن بیی وە نوور خورشید، غاری سەور
مەنمانا تەختش چوون سەهەندی هەور
جەودەم سوراخێ هەنی دی وە چەم
جای هەزار ساڵەی ئەژدیهای ئەرقەم
چوون ڕەزاش ئېد بۍ تاکی تەنیای فەرد
جامە بە هەر سوراخ هیچ بەقا نەکەرد
حەزرەت جە غوسسەی قەومی نا بەکار
سەرنیا وە بان زانووی یاری غار
کەمەربەندی خەم نە پشت کەردەوە
جە ناگاە وە خەیر خاوش بەردەوە
سیدیق هەر بەو تەور بەو دەماخەوە
پاژنەی پاش نېیا بەو سوراخەوە
نەزاناش مارەن کەمینگا شەوە
ناگاە ئەژدیهای داش وە پاشەوە
زەهرش ئەفشان بیی سەر تا پاشدا
گېڵا چوون پەرگار وە ئەعزاشدا
جە ئېشی ئەو نېش دەردش بی کاریی
پېچا و پېچش وەرد جە بېقەراریی
یەک قەترە ئەسرین سیدیقی ئەکبەر
جە ناگاە ڕېزا وە ڕووی پېغەممەر
تا حەزرەت پەرسا ئەی یاری غارم
ئەی مەحرەم وە گرد ڕازی ئەسرارم
فوغان و زاریت سەبەب جە چېشەن
پېم واچە بە ڕاس دڵ وە ئەندېشەن
عەرز کەرد جەی سوراخ سەنگین سامەوە
مارێ ناغافڵ دا وە پامەوە
وەیتەور نېشش سەودان نە جەرگم
یاوان وە قەیران غەرغەرەی مەرگم.[1]