باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نەوەڎ و حۆتەمە
حوشترەکەو حەزرەتی یاگێنە چۊکش دا، حەزرەت فەرماواش ئانە یاگە مزگیەن، ئیتر دیاریشان کەرد، بە ئەمرەو بېچوونی حوشتر ئاخېزشکەرد و دوۍ هەنگامۍ چۆلاتەرۆ مدرا، دیسان زانووش وە زەمین یاونا، حەزرەت فەرماواش ئانە یانە و ماوای منەن. چا وەختۆن ئا یاگۍ بیېنە بە مزگی و مەزارو حەزرەتی جە شارو مەدینەی.
مامووری ئەمرەن عیلمش کامیلەن
ئەو هەرکۊ مەشۊ ئانە مەنزڵەن
مەهاری ناقە وەرداشان جە دەس
کەس یاراش نەبۍ بگېرۊش نەفەس
ناقە ڕاهیی بی یاوا وە جایێ
جایی بۍ ساحیب وە بۍ سەرایێ
ئیسە ئەو جاگە مەسجیدەن جە عام
مەندەن مەمانۊ تا قامی قیام
وشتر چۊکش دا نەوجا وە بۍ غەم
ڕوو کەرد وەجانیب مەککەی موعەززەم
وە ئەمری بېچوون نەوجا ئاخېز کەرد
دوو سێ قەدەم تەر دیسان هەم وېیەرد
باز هەم بە قودرەت ڕەبلعالەمین
ناقە دوو زانوو نیا وە زەمین
حەزرەت فەرماوا: ئانە جای منەن
ئینشاڵڵا یەقین مەنزڵگای منەن
کونە کافێ بۍ قامامی ناتەمام
موڵکی دوو یەتیم سەهل و سوهەیل نام
حەزرەت وە قیمەت ستانا لېشان
بەهای ئەو بېشتەر زەڕ بەخشا پېشان
ئەو ڕۊ ئیرادەی نومای جومعە کەرد
وە یانەی سالم بن عەوف تەشریف بەرد
بە تەوفیقی زات دانای تەوانا
جە ڕووی موعجیزات یەک خوتبە وانا.[1]