باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ششەمە
یەهوودیەکۍ ئامێ پەی هەواڵزانای گۆرەکەیشان (عەبدوڵڵا بەنی سەلام) ، حەزرەت پەنەش واتۍ موسوڵمانۍ بیدۍ، عەبدوڵڵایچ موسوڵمان بېیەن، ئاڎۍ واچېنۍ چېوی چامنە نمەبۊن، عەبدوڵڵا پیێوە عاقڵەن.دمایی حەزرەت فەرمانش کەرد عەبدوڵڵای کە وېش ئاشکار کەرۊن، ئاڎییچ زیارەو نامۍ خوڎا و ڕەسوولیش ئاردە، یەهوویەکۍ چارەشان نەمەند، پەوکەی کەوتۍ دژماندای بە عبدوڵڵای، واچېنۍ ئاڎ سیحرش وەنەکریان، یام شېت بېیەن.
حەزرەت وات: ئەر ئەو ئیمان باوەرۊ
تەسدیق بە خوڎای لایەزەل کەرۊ
ئېوە موسوڵمان مەبین جەی حەڵەت
نادیم جەئاین جەهل و جەهالەت
واتشان: مەگەر هیچ دوڕڕ ئەفشانی
حاشا دعایا جە موسوڵمانی
هەم ئیبنی سەلام ئەهلی شعوورەن
جە ئەی فیلانە سەڎ فرسەخ دوورەن
غەرەز تا سێ جار حەزرەت وات پېشان
بەرشان جە ئایینی بەتاڵی وېشان
واتشان: جەی باب وېت ئازار مەڎەر
فائیڎەش نېیەن مایەش دەردیسەر
عەبدوڵڵا ئەوەڵ وېش خورەدمەندەن
خسووسەن تەمام تەوراتش وەندەن
جەو دما حەزرەت شای خەیرولئەنام
وات: بۊ وە بەر یا ئیبنی سەلام
ناگاه عەبدوڵڵا سەر ئاوەرد وە بەر
وانا ئیسمی پاک الله ئەکبەر
چەنی ئەسحابان پەیوەستەن مەفتوول
ئیمانش ئاوەرد بە خوڎا و بە ڕەسوول
یەهوود واتشان: عەبدوڵڵا خەوەن
بۍ عەقڵ و نادان جە خەر کەمتەرەن
ڕیشمەندی بیسات بادەمان ئەوەن
جەهال و حەهالزادەمان ئەوەن
عەرزکەرد وە لەفزی شیرین
واتش: فیدات بام خەتمولمورسەلین
نەواتم یەهوود گرد حیلە بازەن
کینەجۊی کەززاب ئیفتەرا سازەن
ئەر کوکو کافوور بڕېزوو جە دوود
تۊ باوەڕ مەکەر هەرگیز بە یەهوود
فایز بی بە فەیز ڕوتبەی دنیا و دین
دەردەم شیی نە تەوق ئەسحابی گوزین.
[1]