تارېخو ئەدەبیاتو یارسانی
بەشۍ حەڤڎەهەمە

براو (ماما جەلالۍ) دەسشکەرد بە جابەجاکەردەی فەرمانەکەو تاتەیش، وەڵېنە دەس و چەمېش بەستە، شمشېرش هۊرکېشاو دەسش باڵاکەرد، بەڵام پڕێنە دەسش سەرو سەرەیشۆ ۋشک بی و نامارە وار، پاسەش زانا ئانە کارو شۊتو ئەڎێشەن، ئی جارەشا بە دەسی چەپش شمشېرش هۊرکېشت، بەڵام دیسان هەرچنش کەرد دەسش نامارە وار، پڕێنە ئا زاروڵە کە دلۍ لەمەو جەلالێنە بۍ، زوانش گېرتو واتش: (جەلالە دامنە پاکەنە، ئا زارۊڵە چاڎۍ پېڎامەبۊن جیلوێوە خوڎاییەن) ، چا وەختەنە کاکە ڕەزا پېڎابی دڵ نەوایی ماما جەلالېش کەرد، مژدەش داپەنە کە ئا زاروڵە چاڎۍ پېڎا مەبۊن جیلوێوە خوڎاییەن، نام و نامبانگش گەردوونی پەڕکەرۊن.
براکەش گردو گیانیش کەوت لەرزە، پەشیمانیش بەرۋست، وېشدا ملوو دەس و پەیا واڵەکېشەرە، داواو چەنەوېیەردەیش چەنە کەردە، هەردوېشان پېوەرە گېڵێوە پەی یانەی، براکەش تەمامو قۊمیاکەیش پەی تاتەیش گېڵناوە.
وەختێ ماما جەلالە گەرەکش بۍ بارو زاروڵەکەیش بنیۊ سەرو زەمینی، یانی زاروڵەکەیش بنیۊرە، میرزا ئەمانا فەرمانش بەرکەرد بە گلېربېیەیۆ خەڵکی پەی ئانەی بە چەمۍ وېشان بۋینان کە کناچەکېش چەنی زاروڵەش مەبۊن، چا وەختەنە تەشتێ ئاڵتوون جە ئاسمانۆ ئامارە وار و پڕێنە گرۊڵیێ پڕتەو (ڕوشنایی) دلۍ دەمو جەلالەینە ئاما بەرو لوا دلۍ تەشتەکەی، دلۍ نوورەکەینە زاروڵێشا دی، کوڕ بۍ، قوماشی گرانبەهاو بە قیمەتشان ئاردو پېچاشان زاروڵەکەیرە، نامېشا نېیا (موبارەک شا) ، دمایی نامېش بە شا خوشێن بەرشییە.
شا خوشێن سەردەمو زاروڵەییش جە لوڕستان ژیوان، دمایی پەی وانای شۊنیرە گېڵان، پەی ماوێ لوان پەی هەمەدانی، تەمەنو (32) ساڵینە، وەختێ سەرو قولۍ کەشو (یافتە) ی جە خوڕەم ئابادو لوڕستانی، موناجات چەنی خوڎای کەرۍ، نوورو خوڎای لوانەنە لاشەش و بېیەن بە ڕاوەبەرو یارسانەکا، ئی ڕازە چنیێچە جە قومیاکەو مووسای و کۊ توورۍ مشۊن، ساڵەو (467ک/1074ز) جە گەشتێ پەی شارو کرماشانی، نزیک بە شارو هەرسینی کوچی دمایېنش کەردەن.[1]