تاریخوو ئەدەبیاتو یارسانی
بەشۍ ویس و پەنجەمە

جەمخانە و نیازخانە:
جەمخانە و نیازخانە پېسە بارەگا و پەرەسگاو ئایینو یارسانی دۆری باڵاشا هەن، یاگۍ ئامای دی تەماموو دەستوورە پراکتیکییەکا ئی ئایینێنۍ، سوڵتان سەهاک جە ژیوای وېشەنە بایەخێ فرەش بە گلېرۆبییە ئایینیەکا دان، جە شېعرێنە ماچۊ:
ئیبراهیم یەکتا، ئیبراهیم یەکتا
جە هەفت و هەفتەن، تۊ مەنی یەکتا
یەکتا کەس نیەن، وە وېمەن ئاگا
ئینە ئارمای، ئەزەلی بییا
دەست جەم جە من، قودرەتەش بییا
ڕەنجە دڵ نەوی، وېم کەردم ئېگا
جەم قیبلەگا، یارانم بییان
خاسە غولامان، نە جوملە ئەشیان
هەر کەس نە جەم دا، نە پیر و ئەرکان
وە ڕاست بگېرۊ، دامان سوڵتان
ئانە حەقیقەت، مېر، دیارییەن
جە ڕۊژی حیساو، ئای وە دیارییەن
ماناش:
ئیبراهیمی تاک و تەنیا، جە حۆت حۆتەکا تۊ بە یەکتایی مەنەنی، کەس یەکتا نېیەن، وېم هاگاڎارەنا، ئینە دەسورێ ئەزەلین، دەسو جەمخانەی پەی من جە قودرەتێ ئەزەلیۆ بۍ، تۊ دڵت ڕەجیۊ من وېم ئی قەرارمە دان، جەمخانە قیبلەن، یارا بەیدۍ، دلۍ گردینە غوڵامۍ (یارەکۍ) بەیان، گرد کەسێ جەمخانەنە جە پیر و ماقووڵا، جە ڕاسینە دامانو سوڵتانی گېردۍ، ئینەن هەقیقەت، پیای گۆرە دیارەن، جە ڕۊ حیسابینە خاستەر دیارەن.
جەمخانە، جە ڕوژگارو ڕابەری یارسانەکا پېسە دەزگێوە و یاگۍ ڕېکۋزیێوە دۆرێ باڵاش بېیەن جە بەدیئاردەی شەعائیرەکاشا، دما ڕۊنە ئا دەستوور و ڕەوشتۍ چاگە درووسۍ بیۍ جە لاو یارسانەکاوە پاڕەوی کریێ.[1]