تاریخوو ئەدەبیاتو یارسانی
بەشۍ ویس و یەرەمە

ۋیرو باوەڕو یارسانی جە شېعرەکا سوڵتان سەهاکینە:
نویستەکۍ و ڕەفتارەکۍ سوڵتان سەهاکی دەستووری بنچینەیی ئایینو یارسانینۍ، جە لایێوە پېوەڼی کومەڵایەتی مېیانو یارسانەکا ڕېک مەوزۊن، جە لایێ تەریچۆ ڕا و جاو ۋیروباوەڕو ئایینو یارسانیشان پەی ڕېک ۋزۊن، سوڵتان وېش بە ماتەریال (زات) و گیان (پرتەو) مشناسۊن، لاشەو حۆت کەسەکەی و پرتەو حۆتەوانەی ئاڎییچۍ مەگېڵاوە پەی سەرو جۆهەری بنچینەیی کە (یەک) ەن.
وەسڵ و پېوەنا، وەسڵ و پېوەنا
ها زات و نوورم، وەسڵ و پېوەنا
نەویر ما هەفتەوان، زاتم هەفت تەنا
زات و نوور جەیەک، چەشمە وېم هەنا
ماناش:
من زات و نوورەنا هەردوۍ پېوەرە، نوور حۆتەوانەن، زات حۆت تەنەن، زات و نوور جە یەک سەرچەمۆ هۊرقوڵیا.
جە شېعرێ تەرشەنە سوڵتان سەهاک دەربارەو (دۆنا دۆن) ی مەدوۊن، لاو ئاڎیۆ هېزو کەردگاری یەکەن، بەڵام یاگۍ وېش دلۍ تەنە (لاشە) جیاوازەکانە مەگېرۊن، جە سەردەمو ئاڎەمیۆ تاکو ئیسە دلۍ گەلێ لاشانە وېش ئەرمانان:
تاسیکە نەبۊ، جۆز نېیەن قبووڵ
هەر لە باوە ئایەم، تا ئاخر ڕەسوول
دۆن وە دۆن ئامایمۍ، ئوسوول وە ئوسوول
ڕاھ یاری هەققەن، پەی یاران قبوول
ماناش:
گەر کاکڵە نەبۊن ۋەزی بېیەیش نېیەن، هەر جە ئاڎەمۆ تاکو دمایین پېخامئاوەر شۊنەو یۊیرە ئامایمۍ بە ڕېکوپېکی، ڕاو هەقی پەشتیوانیمانە، جە لاو یاراوە قبووڵەنە.
جە شېعرێ تەرەنە، باس چانەیە کەرۊن کە گیانو عەلی لوانەنە لاشەش:
غولامان وایە، غولامان وایە
پەی ڕۆژی باقی، نیانمان وایە
ئاسمانا مورغا، زەمینا هایە
ستارەی مەزیۊ، نە جامەی خورشید
پیشانی حەیدەر، جای بیم وە ئومید
هەردوو جفت وە هەم، وېنەی مادەونەر
مادەش بنیامین، نەرشەن قەنبەر
دەستوورێ ئامان، پەرۍ گردیشان
شوکر و فیکر و زیکر، وە خواجای وېشان
ماناش:
مەنسووبەکېما چانېنۍ، تاکو ڕۊ قیامەتی نیازمان چانەن، ڕجا و ڕەزامەندی و ڕەمز بە زایە نەلان، ئاسمانەرە لوێ و زەمینەنە نیشتێ، هەسارەی پرشنگدار ئینا بەرگو وەرەتاوینە، جیلوەو حەیدەری بیی بە یاگۍ ئومېڎیم، هەردوېشان بیۍ بە یۊ، پېسە نېر و مای، ما بنیامینەن، نېریچ قەنبەرەن، دەستوورێ ئامان پەی گردیمان، شوکر و ۋیر و زیکر پەی مورشیدەکا.[1]