بنەچەو بەگزاڎەکا هۆرامانی
بەشۊ حەڤڎەهەمۍ

ئامای فەرهاد میرزا و لەشکەرەکەیش پەی مەریوانی:
هۆرامیەکۍ جە پەلامارەو مەریوانینە وەختێ (محەمەد باقر خان)شا گېرت، جە هۆرامان زیڼانیشا کەرد، بەڵام وەرو ئانەی بە ۋردی چەمداریش نەکەرېنۍ، محەمەد باقرخان هەواڵو زیڼانی کەردەکەیش یاونا (فەرهاد میرزا)ی، داواو یارمەتیش چەنەکەردەبۍ، والی(فەرهاد میرزا) هەواڵەکەش ۋەڵانەکەردۆ، بېجگە چن کەسێ نزیکۍ وېش، ناستش کەس بژنەوۊش، کەسە نزیکەکېش هاگاڎارۍ کەردێ کە تەدارەکو سوپێ ئاماڎەکەران پەی سەفەرو مەریوانی، ڕۊ جمعەی، موحەڕەمو ساڵەو(1286ک)جە شارو (سنە)یۆ پەی (مەریوان)ی جمێرە، نزیک بە مەریوانی، جە دەشتایێنە بە نامۍ(شېخ ئیبراهیم) بنەو بارگەشان ۋستو خێمېشا هۊردێ.
هەواڵو ئامای فەرهاد میرزای پەی ناوچەکەی یاوا گۊشو هۆرامیەکا، کوڕەکۍ هەسەن سانی بە دوۍ هەزار تفەنگچیېۋە جمێرە پەی نزیکو دەشتەو شېخ ئیبراهیمی، کە سوپاو فەرهاد میرزایش چەنەبۍ، بە نیازو ئەسای هەقەو تاتەیشا جە فەرهاد میرزای، تفەنگچیە هۆرامیەکۍ ئا شەوە توقەو لەشکەرو فەرهاد میرزایشا دا، مەڵڵا بانگدای پەلامارەو تفەنگچیە هۆرامیەکا دەسش پەنەکەرد، فەرهاد میرزا بە سواری ئەسپەکەیش تەنیا تاواش سەرەش بەرکەرۊن، لەشکرەکەش مەڕیا، هۆرامیەکۍ سەرکۆتۍ.
مەگېڵناوە، وەختی فەرهاد میرزا جە شارو مەریوانی ڕوەو شارو سنەی ڕەمان، ڕانە ئی دېڕە شېعرېشە هەردەم واتېنۆ:
فلیس الفرار الیوم عارا علی الفتی
اڎا کان معلوما شجاعە امسە
شایانو واتەین: چا هەڵمەتېنە هۆرامیەکۍ تاواشا، (عەباس میرزا سوڵتان و عەلی بەگ نائیب) و ژمارێ فرۍ جە سەربازەکا ئوردوگاو قاجاری کوشا، چەنی دەسگېرتەی ملوو تەمامو چەکو ئازوخەو سوپاکېرە.[1]