$دەوڵەت بە نۆبەت$
#هێمن عەبدوڵڵا 2#
#02-07-2014#
ئەوانەی مێژووی کوردیان نەخوێندووەتەوە تێناگەن کە چۆن وا بە پشوودرێژییەوە پێنج کاژێر بۆ چۆڕێک بەنزین لە نۆبەتدا ڕادەوەستین و تەقەی سەریشمان دێت. ئەوانەی وادەزانن ئەمە ساردماندەکاتەوە لەوەی داوای دەوڵەت بکەین و قیرووسیا لە سەربەخۆیی دەکەین بیریان چووەتەوە ئێمە چۆن هاتووین و چۆنیش دەڕۆین.
کاتێک لەدایکدەبین ئەگەر شانسمان هەبێت دەبینە نۆبەرەی دایک و باوکمان. ئەگەرنا دەبینە منداڵی ژمارە حەوت. ئەو حەوت منداڵە جگە لەوەی بۆ لەدایکبوون لە نۆبەتدا بووین، ئاواش دوای لەدایکبوون هەمیشە لە نۆبەتدا دەبین: بەیانییان کە لەخەو هەڵدەستین دەچینە نۆبەتی حەمام یان دەموچاوشووشتن. لەسەر سفرە چاومان نۆبەت لەدەستی دایکمان دەگرێت بۆ ئەوەی زووتر لە منداڵەکانی دیکە قاپە ماستەکە و چایەکی شیرینمان لەپێشدابنێت. کاتێک جەژنێک دێت دیسان نۆبەت دەگرین بۆ جلکڕین و هەندێکجار برایەکی گەورە یان خوشکێکمان بەرماڵێک دەخاتە مزگەوتەوە و بیر باوکمانی دەهێنێتەوە کە جلی لەبەرنەکراومان هەیە. ئیدی دەبێ بە پشوویەکی درێژتر لە ڕاوەستان بۆ چۆڕە بەنزینەکە چاوەڕوانی هاتنی جەژنێکی دیکە بکەین بۆ کڕینی دەستێک جلی نوێ.
ئێمە ڕاهاتووین هەمیشە لە نۆبەتدا بین. بۆیە دەچینە نۆبەتی بەنزینەوە، پێنج کاژێر لەبەر قرچەی گەرما ڕادەوەستین و کاتێک نۆرەمان دەگاتێ “برایەکی #داعش#کوژمان” بە جلی سەربازییەوە دێت و نۆرەبڕی دەکات. هەر ئەو برایە دەچێتە ئەودیوی بەنزینخانەکە و جلە سەربازییەکانی دادەکەنێت و بەنزینەکەی دەفرۆشێتەوە. ئێمە بەوە تەقەی سەرمان دێت، چونکە لەوە خراپتریشمان بەسەرهاتووە. ڕۆژی دواتر دەچینەوە نۆبەتی بەنزین و دوای چوار کاژێر نۆرەمان دێت. هێندە دڵمان خۆشە کە هەستدەکەین عەلی سیستانی داوای سەربەخۆیی کوردستانی کردووە. بەڵام خاوەنی بەنزینخانەکە داوای کۆپۆنمان لێدەکات و نیمانە.
دیسانیش بەنزین وەرناگرین، بەڵام نائومێد نابین. دەچین دوو کاژێر لە نۆبەتدا ڕادەوەستین بۆ وەرگرتنی کۆپۆن. کاتێک نۆرەمان دێت، دەردەکەوێت ئۆتۆمبێلەکەمان بەنێوی خۆمان نییە و مەرجەکانی وەرگرتنی کۆپۆن نامانگرێتەوە. دیسان نائومێد نابین و بە دڵێکی پاکەوە دەچین ئۆتۆمبێلەکە بە ناوی خۆمان بکەین. ئەمجارەش کاژێرێک لە نۆبەتدا دەبین و کاتێک نۆرەمان دێت دەردەکەوێت بایی نیوەی مووچەی ئەو مانگە سزای سەرپێچیی هاتو#چۆمان# لەسەرە و بەر لە بەناوکردن دەبێ پارەکە بدەین. کێشەمان نییە و دەچین پارەکە بدەین، بەڵام دەبینین قەرەباڵغە. لەو بێنە و بەردەیەدا هێندە هیلاکین کە دەچینە شەربەتخانەیەکی نزیک بۆ ئەوەی شەربەتێکی بەتام بۆ بەربانگ بکڕین، ئەگەر کەسیش چاوی لێنەبوو بەدزییەوە قومێکی لێ بخۆینەوە! هێندە لە نۆبەتی شەربەتدا دەمێنینەوە کە دەوامی حکومەت تەواودەبێت و ئیشەکانمان جێبەجێ نابن. شەربەتیش زوو تەواو دەبێت و ناچار بە دەستی بەتاڵ و ئۆتۆمبێلی بێ بەنزینەوە بەرەو ماڵەوە دەگەڕێینەوە.
لە ڕێگە بیرماندێتەوە کە نوێژی دوای نیوەڕۆمان نەکردووە. تەنگاویشین و پێویستمان بە خۆبەتاڵکردن هەیە. بەپەلە خۆمان دەگەیەنینە مزگەوتێک و دەچینە نۆبەتی ئاو دەستی مزگەوتەوە. هێندە ڕادەوەستین، هێندە ڕادەوەستین، هێندە ڕادەوەستین تاوەکوو بیرماندەچێتەوە تەنگاو بووین و بەبزەوە دەچینە ناو بازاڕ بۆ ئەوەی لە نۆبەتی نانکڕیندا ڕاوەستین. لەبەرئەوەی نۆبەتەکەش ئەوسەری دیارنییە، کات بە بیرکردنەوە لە ئاییندەی وڵاتەکەمانەوە دەکوژین. بیر لەوە دەکەینەوە کە چۆن حکومەتەکەمان وەزارەتی بە نۆبەتی تێدایە، چۆن بڕیاروایە حکومەتە خۆجێیەکەی #سلێمانی# بەنۆبەت بەڕێوەببردرێت و چۆنیش سەد ساڵ زیاترە چووینەتە نۆبەت بۆ ئەوەی ببینە دەوڵەت. ئەو بیرکردنەوەیەی دواییان ڕاماندەچڵەکێنێت و لەخۆمانەوە دەترسین کاتێک نۆرەمان هات ببینە دەوڵەت، وەکوو نۆبەتگرتنەکەی ئاو دەستی مزگەوتمان لێبێت و بیرمان بچێتەوە بۆچی هاتووین. [1]