قادر عەبدوڵڵازادە یێ بەرنیاس ب قالە مەڕە هونەرمەندێ شمشاڵ ژەن ئانکو ژەنیارێ بلیلێ، ساڵا 1920 ل گوندێ کولیجە یێ دناڤبەرا هەردوو باژێڕێن #بۆکان# و #مەهاباد# ل ڕوژهەڵاتێ کوردستانێ ژدایک بوویە. ب مخابنیڤە قالە مەڕەیێ شمشاڵ ژەن بابێ خوە نەدیتییە و دایکا وی ژی ل ژیێ 6 ساڵیدە وەغەرا داویێ کرییە. هەر وەکو ئەو بخوە دبێژیت سەرجەمی ژیانا وی ب نارەحەتی و برسێتی و چارەڕشی یێ دە تێپەڕ بوویە. ساڵا 1945-1946 پەیوەندی ب کۆمارا مەهابادێ ڤە کرییە و هەڤاڵینی یەکە نزیک تەڤی هەردوو هونەرمەندێن نەمر هەژار و هێمن ڕە هەبوویە. پشتی ل سێدارەدرانا #قازی محەمەد#ێ سەر کۆمار، قالە مەڕو دێ قەچاخ بیت و بەرێ بدەتە ئشکەفتا گوڵاڵە، یان ژی هەوارا خوە دەبەتە ماڵا عەباس ئاغایێ سەرکەپکان و ئەحمەد ئاغای کۆیە. ساڵێن 1967-1968 بوویە هەڤاڵێ مەلا ئاوارە و مەلا مەحمودێ زەنگنە و سولەیمان موعینی. هەر د ڤان سەروبەنداندە ماڵا وانا دچیتە دەڤەرا بوکان. هەیا ساڵا 1985 هەر ب سەڵتی ژیایە و ژیانا هەڤژینی یێ پێکنەئینایە. هونەرمەند قالە مەڕە هەمیشە ل خەباتا کوردینی یێ دە بەشداری کرییە و هەڤاڵ و نزیکێ تێکوشەران بوویە. هەیا سەردەمێ شوڕەشا گەلێ ئیرانێ کوو ل ساڵا 1978 ێدە بوو ب نهێنی دگەل ڤەلڤینا کوردێن ڕوژهەلات و #حزبا دیموکراتا کوردستان# یا ئیرانێ ڕە بوویە.
قالە مەڕە ل دەمژمێر 11:20 خولەکێ شەڤا پێنج شەمبی یێ 31ێ گوڵانا 1388 کوو دکەتە 21-05-2009 ل مالا خوەدە ل شەقامێ مامۆستا هێمن یا باژێڕێ بوکانێ وەغەرا داویێ کر. تەرمێ ڤی هونەرمەندێ میللی لدویف وەسیەتا وی ب خوە و لسەر بڕیارا مالباتا وی و ب ئامادەبوونا ژمارەیەکە بەرچاڤ ل هوگر وگوهدارێن موزیک و سترانا کوردی، هێڤارییا ئینێ ل تەنشت گۆڕێ #حەسەن زیرەک#ێ هونەرمەند ل چیایێ ناڵەشکێنە هاتە بخاک سپاردن[1].